Na‘e feilaulau‘i ‘e Sīsū ‘ene mo‘uí ma‘á e kakai ta‘ehaohaoa. (Loma 5:8) ‘Oku ‘ikai ha veiveiua ‘oku tau hounga‘ia fakafo‘ituitui ‘i hono fakahaa‘i ‘e Sīsū ‘ene ‘ofa ‘iate kitautolú ‘aki hono foaki ‘ene mo‘uí koe‘uhí ko kitautolu. Neongo ia, ‘oku fiema‘u nai ‘i he taimi ‘e ni‘ihi ke tau manatu‘i na‘e pekia ‘a Kalaisi ma‘a hotau tokouá foki. ‘E lava fēfē ke tau fakahāhā ‘a e ‘ofa faka-Kalaisí ki hotau fanga tokoua mo e fanga tuofāfine ‘oku nau ta‘ehaohaoa hangē pē ko kitautolú? Fakakaukau ki ha founga ‘e tolu. ‘Uluaki, ‘e lava ke tau fakalahi atu hotau ngaahi kaume‘á ke fakakau ki ai ‘a e fa‘ahinga ‘oku kehe honau puipuitu‘á meiate kitautolú. (Loma 15:7; 2 Kol. 6:12, 13) Ua, ‘oku lava ke tau faka‘ehi‘ehi mei hono lea‘aki pe fai ha me‘a ‘e loto-mamahi ai ‘a e ni‘ihi kehé. (Loma 14:13-15) Faka‘osí, kapau ‘oku faihala mai ha taha kiate kitautolu, ‘oku lava ke tau fakavave ke fakamolemole‘i. (Luke 17:3, 4; 23:34) Kapau te tau ngāue mālohi ke fa‘ifa‘itaki kia Sīsū ‘i he ngaahi foungá ni, ‘e hokohoko atu hono tāpuaki‘i ‘e Sihova ‘a e fakataha‘angá ‘aki ‘a e melino mo e fā‘ūtaha.

SIO ‘I HE VITIŌ HOKO ‘O FAKA‘OFO‘OFA ANGE! PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē ‘a e ‘uluaki ongo‘i ‘a Miki fekau‘aki mo ‘ene fakataha‘angá?

• Ko e hā na‘á ne fakatupunga ke liliu ‘a ‘ene ngaahi ongo‘í?

• Na‘e anga-fēfē ‘a e tokoni ‘a e fa‘ifa‘itaki‘anga ‘a Sīsuú ke fakatonutonu ai ‘e Miki ‘ene fakakaukaú? (Mk. 14:38)

• ‘E lava fēfē ke tokoni‘i kitautolu ‘e he Palōveepi 19:11 ke tau vakai ki he kaungā Kalisitiané ‘i ha founga lelei?