‘I he tohi fakamānava‘i ‘a e ‘apositolo ko Paulá kia Taitusí, na‘á ne tohi ai ko e kau tangata ta‘u si‘i angé, kau ai ‘a Taitusi, ‘oku totonu ke nau fai honau lelei tahá ke hoko ko ha “fa‘ifa‘itaki‘anga ‘o e ngaahi ngāue leleí ‘i he tafa‘aki kotoa pē.” (Tai. 2:6, 7) ‘I he konga ki mui ‘o e vahe tatau pē, na‘á ne fakahaa‘i ai ko e kakai ‘a Sihová ‘e fakama‘a kinautolu kae malava ke nau “faivelenga ma‘á e ngaahi ngāue leleí.” (Tai. 2:14) Ko e taha ‘i he ngaahi ngāue lelei ko iá ko e malanga mo faiako ‘o fekau‘aki mo e Pule‘anga ‘o e ‘Otuá. Kapau ko ha to‘utupu koe, te ke ngāue‘aki ‘a e mālohi ‘o ho‘o kei talavoú ke hoko ko ha tāimu‘a tokoni pe tāimu‘a tu‘uma‘u?—Pal. 20:29.

Kapau te ke fie hoko ko ha tāimu‘a, fai ha fokotu‘utu‘u ki he founga ‘e lava ke ke fai ai iá. (Luke 14:28-30) Fakatātaá, ‘e lava fēfē ke ke ma‘u ha pa‘anga fe‘unga ke poupou‘i ho‘o ngāue fakafaifekau taimi-kakató? ‘E fēfē nai ha‘o ma‘u ‘a e ngaahi houa ‘oku fiema‘ú? Lotu kia Sihova ‘o fekau‘aki mo ho tu‘ungá. (Saame 37:5) Talanoa ki ho‘o ongo mātu‘á ‘o fekau‘aki mo ho‘o palaní pea pehē ki he fa‘ahinga kuo nau lavame‘a ‘i he ngāue tāimu‘á. Pea ngāue leva ke a‘usia ho‘o taumu‘á. ‘E tāpuaki‘i ‘e Sihova ho‘o ngaahi feinga faivelenga ‘i he‘ene ngāué!

SIO ‘I HE VITIŌ TO‘UTUPU ‘OKU NAU FAKALĀNGILANGI‘I ‘A SIHOVA, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e ngaahi pole kuo iku‘i ‘e he ni‘ihi ke hoko ai ko ha tāimu‘á, pea na‘a nau fakahoko fēfē ia?

• ‘E lava fēfē ke tokoni‘i ‘e he ngaahi mātu‘á ‘enau fānaú ke nau tāimu‘a tu‘uma‘u?

• Ko e hā ‘oku mahu‘inga ai ke ‘i ai ha taimi-tēpile ki he ngāue fakamalangá?

• ‘E lava fēfē ke fakalototo‘a‘i mo tokoni‘i ‘e he ngaahi mēmipa ‘o e fakataha‘angá ha tāimu‘a?

• Ko e hā ‘a e ngaahi tāpuaki ‘oku ma‘u ‘e he fa‘ahinga ‘oku nau tāimu‘á?