Ko e kotoa ‘o e kakai ‘a Sihová ‘oku lava ke nau fokotu‘u ha lēkooti ‘o e ngāue leleí ‘i he‘enau ngāue toputapu ki hotau ‘Otuá. ‘I he hangē ko ha mātu‘a ‘ofa ‘okú ne koloa‘aki ‘a e lavame‘a ‘a ‘ene fānaú, he‘ikai fakangalo‘i ‘e Sihova ‘a e ngāue pea mo e ‘ofa kuo tau fakahaa‘i ki hono huafá. (Māt. 6:20; Hep. 6:10) Ko e mo‘oni, ‘oku kehekehe ‘a e ngaahi malavá mo e tu‘ungá. Neongo ia, kapau te tau fai hotau lelei tahá ‘i he‘etau ngāue kia Sihová, te tau fiefia. (Kal. 6:4; Kol. 3:23) ‘I ha laui ta‘u, ‘oku laui afe ai ha fanga tokoua mo e fanga tuofāfine kuo nau ngāue ‘i Pēteli. Te ke malava ke ke pole ki he ngāue Pētelí? Kapau ‘oku ‘ikai, ‘e lava ke ke fakalototo‘a‘i ha tokotaha ke fai pehē, pe tokoni ki ha taha ‘i he fāmili Pētelí ke hokohoko atu ‘a e ngāue ‘i he founga makehe ko iá?

SIO HE VITIŌ FAKAFAINGAMĀLIE‘I KOE KI HE NGĀUE PĒTELÍ, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e fakaue‘iloto ki he ngāue ‘i Pētelí?

• Ko e hā ‘oku lea‘aki ‘e ha ni‘ihi ki he ngaahi tāpuaki ‘o e ngāue ‘i Pētelí?

• Ko e hā ‘a e ngaahi fiema‘u pau ki he ngāue Pētelí?

• ‘E lava fēfē ke ke tohi kole ki he ngāue Pētelí?