Ko hai ke talitali loto-māfaná? Ko ha taha pē ‘okú ne ma‘u ‘etau ngaahi fakataha faka-Kalisitiané—mei he tokotaha ha‘u fo‘oú ki he ngaahi kaungāme‘a fuoloá. (Loma 15:7; Hep. 13:2) Mahalo ko ha kaungātui ‘oku ‘a‘ahi mai mei ha fonua ‘e taha, pe ko ha Kalisitiane ‘ikai longomo‘ui ko e ‘uluaki taimi eni ‘i he ta‘ú ‘okú ne ma‘u ‘a e fakatahá. Faka‘uta atu ki he anga ho‘o ongo‘í ‘i ha tu‘unga pehē. ‘Ikai nai te ke hounga‘ia ‘i hano ma‘u ha fakafe‘iloaki loto-māfana? (Māt. 7:12) Ko ia ai, ko e hā ‘oku ‘ikai te ke fai ai ha feinga lahi ke ke ‘alu holo ‘i he Fale Fakataha‘angá ‘o fakafe‘iloaki ki he ni‘ihi kehé ‘i he ki mu‘a mo e hili ‘a e fakatahá? Ko e me‘a eni ‘e tokoni ki hono ma‘u ha ‘atimosifia māfana mo ‘ofa pea ‘omi ai ‘a e lāngilangí kia Sihova. (Māt. 5:16) Ko hono mo‘oní, he‘ikai nai ke malava ke tau lea fakafo‘ituitui ki he tokotaha kotoa ‘oku ‘i aí. Kae kehe, kapau te tau feinga kotoa ke fai ‘etau tafa‘akí ‘e ongo‘i ‘e he tokotaha kotoa ‘oku talitali lelei ia. *

Ko e anga-talitali kakai mo‘oní ‘oku ‘ikai ke fakahāhā pē ia ‘i he ngaahi taimi makehé, hangē ko e Fakamanatú ka ‘i he taimi kotoa pē. ‘I he taimi ‘oku vakai ai mo hokosia ‘e he fa‘ahinga ‘oku toki kau fo‘ou maí ‘a e fakahāhā ‘o e ‘ofa faka-Kalisitiané, ‘e ue‘i ai kinautolu ke fakahīkihiki‘i ‘a e ‘Otuá pea kau fakataha mo kitautolu ‘i he lotu ma‘á.—Sione 13:35.