‘I he Tūsite ‘o ‘Epeleli 11, ko e tokolahi ‘o e kau Kalisitiane ‘ikai longomo‘uí te nau ma‘u ‘a e Fakamanatú. Na‘a nau kau ki he lova ki he mo‘uí ka kuo nau māmālie hifo ‘i ha ngaahi ‘uhinga kehekehe, ko e ni‘ihi ‘o e ngaahi ‘uhingá ‘oku hā ‘i he polosiua Foki kia Sihova. (Hep. 12:1) Neongo ia, ko e fa‘ahinga ‘ikai longomo‘uí ‘oku nau kei mahu‘inga pē kia Sihova, he na‘á ne fakatau kinautolu ‘aki ‘a e ta‘ata‘a hono ‘Aló. (Ngā. 20:28; 1 Pita 1:18, 19) ‘E lava fēfē ke tau tokoni‘i kinautolu ke nau foki mai ki he fakataha‘angá?

‘Oku kumi ‘a e kau mātu‘a ‘i he fakataha‘angá ki he kau Kalisitiane ‘ikai longomo‘uí ke tokoni‘i kinautolu ‘o hangē pē ko ha tauhi-sipi ‘okú ne tōtōivi hono kumi ha sipi kuo hē mei he tākangá. (Luke 15:4-7) ‘Oku tapua atu ai ‘a e tokanga ‘ofa ‘a Sihová. (Sel. 23:3, 4) ‘Oku ‘ikai ko e kau mātu‘á pē, ka ko kitautolu kotoa ‘oku lava ke tau tokoni‘i ‘a e fa‘ahinga ko iá. Ko ‘etau ngaahi feinga ke fakahāhā ‘a e anga-‘ofa mo e kaungāongo‘í ‘oku fakahōifua ia kia Sihova pea ‘oku lava ke tāpuaki‘i lahi ia. (Pal. 19:17; Ngā. 20:35) Ko ia ai, fakakaukau ki he fa‘ahinga ‘oku lava ke ke fakalototo‘a‘í pea fai ia ‘o ‘ikai toloi!

SIO ‘I HE VITIŌ FAKALOTOTO‘A‘I ‘A E FA‘AHINGA ‘IKAI LONGOMO‘UÍ, PEA LĀULEA LEVA KI HE NGAAHI FEHU‘I KO ENÍ:

• Ko e hā ‘a e me‘a na‘e tamu‘omu‘a ‘a Abbey ke faí ‘i he‘ene fetaulaki mo ha Fakamo‘oni na‘e te‘eki ai ke ne ‘ilo‘i?

• Ko e hā ‘oku totonu ai ke tau fakaofiofi ki he kau mātu‘á kapau ‘oku tau fakakaukau ke tokoni‘i ha tokotaha ‘oku ‘ikai longomo‘ui?

• Na‘e anga-fēfē ‘a e teuteu ‘a Abbey ki he‘ene ‘a‘ahi hono ua kia Laura?

• Na‘e anga-fēfē ‘a e fakahāhā ‘e Abbey ‘a e kīvoí, anga-kātakí mo e ‘ofá ‘i he‘ene feinga ke fakalototo‘a‘i ‘a Laura?

• Ko e hā ‘oku lava ke tau ako mei he talanoa fakatātā ‘a Sīsū ‘i he Luke 15:8-10?

• Ko e hā ‘a e ngaahi tāpuaki na‘e ma‘u ko e ola ia mei he ngaahi feinga fakataha ha tokolahi ke tokoni‘i ‘a Laura?