Na‘e fakahīkihiki‘i ‘e Paula mo Sailosi ‘a e ‘Otuá ‘aki ha hiva lolotonga ‘ena nofo pōpulá. (Ngā. 16:25) ‘I hotau taimí, na‘e hiva ‘aki ‘e hotau kaungātuí ‘a e ngaahi hiva ‘o e Pule‘angá lolotonga ‘enau ‘i he kemi fakamamahi ko Sachsenhausen ‘i Nasi Siamané mo e lolotonga hono ‘ave fakamālohi kinautolu ki Saipīliá. Ko e fa‘ifa‘itaki‘anga ko ení, ‘oku fakatātā‘i mai ai ‘a e mālohi ‘o e hivá ke fakaivia ‘a e loto-to‘a ‘a e kau Kalisitiane ko ia ‘oku nau fehangahangai mo e ngaahi ‘ahi‘ahí.

‘Oku vavé ni ke ma‘u ‘a e tohi hiva fo‘ou ko ení ‘i ha ngaahi lea lahi ‘a ia ‘oku fakakaveinga ko e “Sing Out Joyfully” kia Sihova. ‘I he‘etau ma‘u pē ha tatau, ‘e lava ke tau ‘ai ke ma‘u ‘a e fasí ‘i hotau ‘atamaí ‘aki ‘etau ako ‘a e ngaahi hivá ‘i he‘etau lotu fakafāmilí. (‘Ef. 5:19) Pea ‘e tokoni‘i leva kitautolu ‘e he laumālie mā‘oni‘oní ke tau manatu‘i ia ‘i he taimi ‘o e ‘ahi‘ahí. ‘Oku lava ke tokoni‘i kitautolu ‘e he ngaahi hiva ‘o e Pule‘angá ke hangataha ‘etau tokangá ki he‘etau ‘amanakí. He ‘oku fakaivia ai kitautolu ‘i he‘etau fehangahangai mo e ngaahi ‘ahi‘ahí. Pea ‘i he taimi ‘oku tau ongo‘i lelei aí, ko e ngaahi fasi fakatupu langa haké ‘okú ne ‘ai kitautolu ke tau ‘hiva fiefia’ koe‘uhi ko e tu‘unga lelei ‘i hotau lotó. (1 Kal. 15:16; Saame 33:1-3) ‘Ofa ke tau ngāuelelei‘aki ‘etau ngaahi hiva ‘o e Pule‘angá!

SIO ‘I HE VITIŌ KO HA HIVA ‘OKÚ NE FAKAIVIA ‘A E KAU NGĀUÉ, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e ngaahi tu‘unga na‘á ne ‘ai ‘a Tokoua Frost ke ne fa‘u ha fo‘i hiva?

• Na‘e anga-fēfē hono fakaivia ‘e he hivá ‘a e fanga tokoua ‘i he kemi fakamamahi ko Sachsenhausen?

• Ko e hā ha ngaahi tu‘unga faka‘aho ‘e lava ke fakaivimālohi‘i ai koe ‘e he ngaahi hiva ‘o e Pule‘angá?

• Ko e hā ‘a e ngaahi hiva ‘o e Pule‘angá te ke sai‘ia ke ako ma‘ulotó?