Kamata ‘i he ta‘ú ni, te tau ma‘u ai ha taimi lahi ange ke mateuteu ai ki he Fakamanatu ‘o e pekia ‘a Kalaisí. ‘I he taimi ‘e tō ai ‘a e ‘aho ‘o e Fakamanatú ‘i he lolotonga ‘o e uiké, ko e Fakataha ki he Mo‘uí mo e Ngāue Fakafaifekaú ‘e ‘ikai ke toe fai ia ‘i he uike ko iá. ‘I he taimi ‘e tō ai ‘a e Fakamanatú ‘i he faka‘osinga ‘o e uiké, ‘e ‘ikai ke toe fai ‘a e malanga ia ma‘á e kakaí mo e ako Taua Le‘ó. Te ke lava ‘o ngāuelelei‘aki ‘a e taimi ko iá? Hangē pē ko ia ‘i he ‘uluaki senitulí, kuo pau ke fai ha ngaahi teuteu koe‘uhi ke fakahoko ‘a e kātoanga mahu‘inga ko ení. (Luke 22:7-13; km 3/15 1) Ka, ko kitautolu kotoa ‘oku totonu ke tau teuteu hotau lotó. ‘E lava fēfē ke tau fai eni?

• Fakakaukauloto ki he mahu‘inga ‘o e kau ki aí.—1 Kol. 11:23-26

• Lotu pea fakakaukau ki ho vaha‘angatae mo Sihová.—1 Kol. 11:27-29; 2 Kol. 13:5

• Lau mo fakalaulauloto ki he ngaahi ma‘u‘anga fakamatala Fakatohitapu ‘oku lāulea ‘o fekau‘aki mo e ‘uhinga ‘o e Fakamanatú.—Sione 3:16; 15:13

Ko e kau malanga ‘e ni‘ihi ‘oku nau lau mo fakalaulauloto ki he lau Tohi Tapu ki he Fakamanatú ‘oku hā ‘i he Ko Hono Vakai‘i Faka‘aho ‘a e Tohi Tapú. ‘Oku lau ‘e he ni‘ihi ia ‘a e ngaahi konga Tohi Tapu ‘oku hā ‘i he sātí. Ko e ni‘ihi ia ‘oku nau fakamanatu ‘a e ngaahi kupu ‘i he Taua Le‘o ‘oku lāulea ai ki he Fakamanatú pea mo e ‘ofa ‘a Sihova mo Sīsū ‘oku fakahāhā mai kiate kitautolú. Pe ko e hā pē ‘a e fa‘ahinga founga ako ‘okú ke filí, ‘ofa ke ne ‘ai koe ke ke toe ofi ange ai kia Sihova pea mo hono ‘Aló.