Na‘e ‘ilo‘i ‘e Sēkope ‘oku tuha ‘a Sihova mo e anga-lī‘oa ma‘ata‘ataá, neongo na‘e te‘eki ai ke Ne ‘oange ha lao fekau‘aki mo e tauhi ‘aitolí. (‘Eki. 20:3-5) ‘I he hili pē hono fekau ‘e Sihova ke ne foki ki Pētelí, na‘e fekau‘i leva ‘e Sēkope ‘a e tokotaha kotoa ke li‘aki ‘enau ngaahi ‘aitolí. Na‘e faka‘auha leva ‘e Sēkope ‘a e ngaahi ‘aitolí, kau ai mo e ngaahi hau, ngalingali na‘e tui ia ko ha me‘a ‘omi monū. (Sēn. 35:1-4) ‘Oku ‘ikai ha veiveiua na‘e hōifua ‘a Sihova ‘i he ngaahi ngāue ‘a Sēkopé.

Kiate kitautolu, ‘e lava fēfē ke tau ‘oange kia Sihova ‘a e anga-lī‘oa ma‘ata‘ataá? Ko e me‘a mahu‘inga ‘e taha kuo pau ke tau faí ko e faka‘ehi‘ehi mei ha fa‘ahinga me‘a pē ‘oku kaunga ki he tauhi ‘aitolí pe fakaha‘ele fakafa‘ahikehe. ‘E kau ki ai ‘etau faka‘auha ha ngaahi me‘a pē ‘oku fekau‘aki mo e tō‘onga fakafa‘ahikehé pea sivisivi‘i fakalelei ‘a e ngaahi me‘a ‘oku tau lau, sio mo fanongo ki aí. Ko e fakatātaá, ‘eke hifo kiate koe: ‘‘Oku ou sai‘ia ke lau ‘a e ‘ū tohi pe sio he ngaahi faiva ‘oku ‘i ai ‘a e ngaahi me‘a hangē ko e vemipaea, fakatēvolo pe ko e faimaná? ‘Oku kau ‘i he‘eku fakafiefiá ‘a e me‘a fakafaimana, pe talatuki ‘o pehē ko ha me‘a fakaoli pē?’ ‘Oku totonu ke tau mavahe ‘aupito mei ha me‘a pē ‘oku fehi‘a ai ‘a Sihova.—Saame 97:10.

SIO ‘I HE VITIŌ “TALITEKE‘I ‘A E TĒVOLÓ,” PEA TALI LEVA ‘A E NGAAHI FEHU‘I KO ENÍ:

• Ko e hā ‘a e palopalema na‘e malanga hake ‘i he mo‘ui ‘a e tokotaha ako Tohi Tapu ko Pesí?

• Ko e hā ‘oku fakapotopoto ai ke kumi ki he tokoni ‘a e kau mātu‘á ‘i he fekau‘aki mo e fakaha‘ele fakafa‘ahikehé?

• Kapau ‘oku tau fiema‘u ‘a e malu‘i ‘a Sihová, ko e hā kuo pau ke tau li‘akí?

• Ko e hā ‘a e ngāue pau na‘e fai ‘e Pesí?

• ‘I he feitu‘u ‘okú ke nofo aí, ko e hā ‘a e ngaahi founga ‘e ni‘ihi ke faka‘ehi‘ehi mei he tākiekina fakatēmenioó?