Na‘e ako‘i ‘e Sīsū: “Kuo mou ma‘u ta‘etotongi, foaki ta‘etotongi.” (Māt. 10:8) ‘Oku tau pīkitai ki he fakahinohino mahino ko iá ‘aki ‘a e ‘ikai ke tau ‘eke totongi ki he kakaí ki ha tatau ‘o e Tohi Tapú pe ko ‘etau ‘ū tohi Fakatohitapú. (2 Kol. 2:17) Ka neongo ia, ‘oku ‘i he ‘ū tohí ni ‘a e ngaahi mo‘oni mahu‘inga mei he Folofola ‘a e ‘Otuá. Ko e ngāue lahi mo e fakamole lahi ‘a hono pulusi mo fakaheka ‘a e ‘ū tohí ki he ngaahi fakataha‘anga takatakai ‘i he māmaní. Ko ia ai, ‘oku totonu ke tau ‘ave pē ‘a e me‘a ‘oku tau fiema‘ú.

Fakapotopoto ‘i hono ‘ave ‘a e ‘ū tohí ki he ni‘ihi kehé, na‘a mo e ‘i he ngaahi feitu‘u faifakamo‘oni ki he kakaí. (Māt. 7:6) ‘I he ‘ikai ‘oatu pē ‘a e ‘ū tohí ki he fa‘ahinga ‘oku ‘alu haké, feinga ke fetalanoa‘aki mo kinautolu ke fakapapau‘i ‘oku nau mahu‘inga‘ia. ‘E lava ke ke tali ‘io ki ha fo‘i fehu‘i ‘e taha ‘i he puha hoko haké? Kapau ‘oku ‘ikai lava ke ke fakapapau‘i ‘oku mahu‘inga‘ia ha taha, ko e lelei tahá ke ‘oange kiate ia ha tuleki. Ko hono mo‘oní, kapau ‘okú ne kole ha makasini pe ko ha tohi kehe, ‘oku tau fiefia ke ‘oange ha tatau kiate ia.—Pal. 3:27, 28.