Ko e ‘amanakí ‘oku hangē ha taulá. (Hep. 6:19) ‘Okú ne tokoni‘i kitautolu ke tau hao mei he tūkia fakalaumālié ‘i he‘etau fehangahangai mo e hou tu‘u ‘a e tahí. (1 Tīm. 1:18, 19) Ko e hou tu‘u ‘a e tahí ‘oku kau nai ki ai ‘a e loto-mamahi fakafo‘ituitui, mole fakamatelie, puke ‘i ha taimi lōloa, mate ha taha ‘ofeina pe ko ha toe fakamanamana kehe ki he‘etau anga-tonú.

Ko e tuí mo e ‘amanakí ‘okú ne ‘ai kitautolu ke tau lava ‘o sio mā‘ala‘ala ki he tāpuaki ‘oku tala‘ofa‘aki maí. (2 Kol. 4:16-18; Hep. 11:13, 26, 27) Ko ia tatau ai pē pe ‘oku tau ma‘u ‘a e ‘amanaki fakahēvaní pe ki he māmaní, kuo pau ke tau hanganaki fakaivimālohi‘i ia ‘aki ‘a e fakalaulauloto ki he ngaahi tala‘ofa ‘oku lēkooti ‘i he Folofola ‘a e ‘Otuá. ‘I he taimi leva te tau mamahi ai ‘i he ngaahi ‘ahi‘ahí, ‘e faingofua ange ai ke tauhi ma‘u ‘etau fiefiá.—1 Pita 1:6, 7.

SIO ‘I HE VITIŌ FIEFIA ‘I HE ‘AMANAKÍ, PEA TALI ‘A E NGAAHI FEHU‘I KO ENÍ:

• Ko e hā ko ha fa‘ifa‘itaki‘anga lelei ai ‘a Mōsese ke fa‘ifa‘itaki ki aí?

• Ko e hā ‘a e fatongia ‘oku hilifaki ki he ngaahi ‘ulu‘i fāmilí?

• Ko e hā ha ngaahi kaveinga ke lāulea nai ki ai ‘i he polokalama Lotu Fakafāmilí?

• ‘E lava fēfē ke tokoni‘i koe ‘e he ‘amanakí ke ke fehangahangai mo e ngaahi ‘ahi‘ahí ‘i he falala-pau?

• Ko e hā ‘okú ke fakatu‘otu‘a atu ki aí?