‘UHINGA ‘OKU MAHU‘INGA AÍ: Kapau “ko e ngaahi fakakaukau ‘i he loto ‘o ha tangata ‘oku hangē ia ha ngaahi vai lolotó,” ‘oku hangē leva ‘a e ngaahi fehu‘í ha kane ke fusi hake ia. (Pal. 20:5) ‘Oku tokoni ‘a e ngaahi fehu‘í ke fakakau mai ‘etau kau fanongó. Ko e ngaahi tali ki he ngaahi fehu‘i kuo filifili leleí ‘oku fa‘a fai mai ai ha ngaahi fakamatala mahu‘inga. Na‘e ngāueolalelei‘aki ‘e Sīsū ‘a e ngaahi fehu‘í. ‘E lava fēfē ke tau fa‘ifa‘itaki kiate ia?

FOUNGA HONO FAI IÁ:

• ‘Eke ha ngaahi fehu‘i fakatupu fakakaukau. Na‘e ‘eke ‘e Sīsū ha ngaahi fehu‘i hokohoko ke fakapapau‘i ‘a e anga ‘o e fakakaukau ‘a ‘ene kau ākongá. (Māt. 16:13-16; be 238 ¶3-5) Ko e hā ha ngaahi fehu‘i fakatupu fakakaukau ‘e lava ke ke ‘eke?

• ‘Eke ha ngaahi fehu‘i taki. Ke fakatonutonu ‘a e ngaahi fakakaukau ‘a Pitá, na‘e ‘eke ‘e Sīsū ha ngaahi fehu‘i pea tokonaki mo ha ngaahi tali ‘o taki ai ‘a Pita ki he fakamulituku totonú. (Māt. 17:24-26) Ko e hā ha ngaahi fehu‘i taki ‘e lava ke ke ‘eke ke tokoni‘i ha taha ke a‘u ki he fakamulituku totonú?

• Fakaongoongolelei‘i ho‘o tokotaha fanongó. Hili ha ‘tali pōto‘i’ ‘a ha sikalaipe, na‘e fakaongoongolelei‘i ia ‘e Sīsū. (Mk. 12:34) ‘E lava fēfē ke ke fakaongoongolelei‘i ha taha ‘okú ne tali ha fehu‘i?

SIO ‘I HE ‘ULUAKI KONGA ‘O E VITIŌ FAI ‘A E NGĀUE NA‘E FAI ‘E SĪSUÚ—FAIAKO, PEA TALI LEVA ‘A E ONGO FEHU‘Í NI:

• Ko e hā ko ha fakatātā ai eni ‘o e faiako ‘ikai leleí, neongo ‘oku tonu ‘a e fakamatalá?

• Ko e hā kuo pau ai ke tau fai ‘a e me‘a lahi ange ‘o ‘ikai fakamatala‘i pē ‘a e fakamatalá?

SIO ‘I HE KONGA UA ‘O E VITIOÓ, PEA TALI LEVA ‘A E ONGO FEHU‘Í NI:

• Na‘e anga-fēfē hono ngāueolalelei‘aki ‘e he tokouá ‘a e fehu‘í?

• Ko e hā ha ngaahi tafa‘aki kehe ‘o ‘ene faiakó ‘e lava ke tau fa‘ifa‘itaki ki ai?