Ko e hā hono fuoloa ho‘o tatali ke hoko mai ‘a e Pule‘anga ‘o e ‘Otuá? Kuó ke kātekina anga-kātaki neongo ‘a e ngaahi faingata‘á? (Loma 8:25) ‘Oku fehangahangai ‘a e kau Kalisitiane ‘e ni‘ihi mo e tāufehi‘á, ngaohikoviá, tuku pilīsoné, na‘a mo e fakamanamana‘i ki he maté. Ko e ni‘ihi tokolahi ‘oku nau fekuki mo e ngaahi faingata‘a hangē ko e mahaki tauhí pe hoholo ke motu‘a angé.

Ko e hā te ne tokoni‘i kitautolu ke tau tatali vēkeveke ‘i he fekuki mo ha faingata‘a pē? Kuo pau ke tau fakaivimālohi‘i faka‘aho ‘etau tuí ‘aki hono lau ‘a e Tohi Tapú mo fakalaulauloto ki ai. Kuo pau ke tau tokangataha ki he‘etau ‘amanakí. (2 Kol. 4:16-18; Hep. 12:2) Kuo pau ke tau hū tōtōaki kia Sihova ‘i he lotu pea kōlenga kiate ia ki he mālohi ‘a hono laumālie mā‘oni‘oní. (Luke 11:10, 13; Hep. 5:7) Ko ‘etau Tamai ‘ofá ‘e lava ke ne tokoni‘i kitautolu ke tau “kātekina ‘a e me‘a kotoa pē ‘i he kātaki mo e fiefia.”—Kol. 1:11.

SIO ‘I HE VITIŌ KUO PAU KE TAU “LELE FAKATAHA MO E KĀTAKI”—FALALA PAU KI HONO MA‘U ‘A E PALÉ, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e “ngaahi me‘a ‘oku hoko ta‘e‘amanekina” ‘e hoko nai ‘i he mo‘uí? (Tml. 9:11)

• ‘Oku anga-fēfē hono tokoni‘i kitautolu ‘e he lotú ‘i he fehangahangai mo e ngaahi faingata‘á?

• Kapau ‘oku ‘ikai lava ke tau fai ‘a e ngaahi me‘a na‘a tau lava ‘o fai ki mu‘a ‘i he ngāue ‘a Sihová, ko e hā ‘oku totonu ai ke tau tokangataha ki he me‘a ‘oku tau kei malavá?

• Ko e hā te ne tokoni‘i koe ke ke hanganaki falala pau ki hono ma‘u ‘a e palé?