MO‘UI KO HA KALISITIANE
Fakalelei‘i ‘Etau Pōto‘i ‘i he Ngāue Fakafaifekaú—Ta‘ofi ‘a e Ngaahi Ako Tohi Tapu ‘Oku ‘Ikai Fakalakalaká
‘UHINGA ‘OKU MAHU‘INGA AÍ: Kuo pau ke ui ‘a e kakaí ki he huafa ‘o Sihová koe‘uhí ke fakahaofi. (Loma 10:13, 14) Kae kehe, ‘oku ‘ikai loto ‘a e tokotaha kotoa ke ako ‘a e Tohi Tapú pea mo‘ui‘aki ‘a e ngaahi tu‘unga ‘a Sihová. ‘Oku tau ngāuelelei‘aki hotau taimí ‘i he ngāue fakafaifekaú ‘i hono tokoni‘i ‘a e fa‘ahinga ‘oku nau loto-mo‘oni ke fai ha ngaahi liliu ke fakahōifua‘i ‘a Sihova. Kapau ‘oku ‘ikai ke fai ‘e he tokotaha akó ha fakalakalaka ‘i he hili ha vaha‘a taimi fe‘ungamālie, ‘oku fakapotopoto ke ta‘ofi ‘a e akó pea ngāue‘aki hotau taimí ke tokoni‘i ‘a e fa‘ahinga ‘oku tohoaki mai ‘e Sihova ki he‘ene kautahá. (Sione 6:44) Ko e mo‘oni, kapau ‘i he kaha‘ú ‘e fakahaa‘i ‘e he tokotahá ha “hehema totonu ki he mo‘ui ta‘engatá,” ‘oku tau fiefia ke toe hoko atu ‘ene ako Tohi Tapú.—Ngā. 13:48.
FOUNGA HONO FAI IÁ:
-
Fakaongoongolelei‘i ‘a e tokotaha akó ‘i he‘ene loto ke ma‘u ‘a e ‘ilo totonú.—1 Tīm. 2:4
-
Fakamamafa‘i ‘a e mahu‘inga ‘o ‘ene ngāue‘aki ‘a e me‘a kuó ne akó.—Luke 6:46-49
-
Lāulea anga-‘ofa ki he talanoa fakatātā ‘a Sīsū ‘o fekau‘aki mo e tokotaha tūtū‘í, pea ‘eke ange ‘a e me‘a ‘okú ne ta‘ofi nai ia mei he‘ene hoko ‘o fakalakalaká.—Māt. 13:18-23
-
Fakamatala‘i fakapotopoto ‘a e ‘uhinga ‘okú ke ta‘ofi ai ‘a e akó
-
‘Ai ke ne ‘ilo‘i te ke toutou ‘a‘ahi atu ke fakalototo‘a‘i ia pea ‘e lava ke hoko atu ‘a e akó ‘i he kaha‘ú ‘o kapau ‘okú ne fai ha fakalakalaka
SIO ‘I HE VITIOÓ, PEA TALI LEVA ‘A E NGAAHI FEHU‘I KO ENÍ:
-
Ko e hā na‘á ke ako mei he fetalanoa‘akí na‘e fakahaa‘i mahino ai na‘e ‘ikai fai ‘e he tokotaha akó ha fakalakalaka fakalaumālie?
-
Na‘e anga-fēfē hono tokoni‘i ‘e he tokotaha malangá ‘a e tokotaha akó ke ne mahino‘i ‘a e fiema‘u ke ne fai ha ngaahi liliú?
-
Na‘e anga-fēfē hono fakahaa‘i ‘e he tokotaha malangá ‘e kei lava pē ke toe hoko atu ‘a e akó ‘i he kaha‘ú?