‘I ho‘o sio ki ha matala‘i ‘akau lanu kehekehe, ko ha langi fetu‘u‘ia, ko e ‘u‘ulu ha vaitafe, ‘okú ke sio ai ki he ngaahi ngāue ‘a e to‘ukupu ‘o e Tokotaha-Fakatupú? Ko e ngaahi me‘a fakatupu takatakai ‘iate kitautolú ‘oku fakahaa‘i mahino ai ‘a e ngaahi ‘ulungaanga ta‘ehāmai ‘o Sihová. (Loma 1:20) ‘I he ki‘i tu‘u pea fakakaukau ki he me‘a ‘oku tau vakai ki aí, ‘oku malava ai ke tau ‘ilo‘i ‘a e mālohi, ‘ofa, poto mo e fakamaau totonu ‘a e ‘Otuá pea pehē ki he‘ene nima-homó.—Saame 104:24.

Ko e hā ha ni‘ihi ‘o e ngaahi ngāue fakaefakatupu ‘a Sihová ‘okú ke fakatokanga‘i ‘i he ‘aho taki taha? Neongo ‘okú ke nofo ‘i ha kolo lahi, te ke sio nai ai ki he ngaahi manupuná pe ‘ulu‘akaú. Ko hono vakai‘i fakalelei ‘a e fakatupu ‘a Sihová ‘oku lava ke tokoni ia ki hono fakasi‘isi‘i ‘etau puputu‘ú, ‘ai ‘etau palopalemá ki hono tu‘unga totonú, pea fakalahi atu ‘etau tui ki he malava ‘a Sihova ke ne tokanga‘i kitautolu ‘o a‘u ki he kotoa ‘o ‘itānití. (Māt. 6:25-32) Kapau ‘oku ‘i ai ha‘o fānau, tokoni‘i kinautolu ke nau ‘ilo‘i ‘a e ngaahi ‘ulungaanga ta‘ehanotatau ‘o Sihová. ‘I he tupulekina ‘etau hounga‘ia ki he fakatupu takatakai ‘iate kitautolú, te tau toe ‘unu‘unu ofi ange ai ki he Tokotaha-Fakatupú.—Saame 8:3, 4.

SIO ‘I HE VITIŌ FAKAOFO ‘O NATULÁ ‘OKÚ NE FAKAE‘A ‘A E LĀNGILANGI ‘O E ‘OTUÁ—MĀMÁ MO HONO LANÚ, PEA TALI LEVA ‘A E NGAAHI FEHU‘I KO ENÍ:

• ‘Oku anga-fēfē ‘a e ‘ai ‘e hotau matá ke tau malava ‘o tala ‘a e ngaahi lanú?

• Ko e hā ‘okú ne fakatupunga ‘a e lanu kehekehé?

• Ko e hā ‘oku tau sio ai ki he ngaahi lanu kehekehe ‘i he langí?

• Ko e hā ‘a e ngaahi lanu ‘oku fakamānako ‘i he me‘a fakatupú ‘okú ke sio ki ai ‘i ho ‘apí?

• Ko e hā ‘oku totonu ai ke tau siofi fakalelei ‘a e fakatupú?