ʻI he ofi ke ngata ʻa e fokotuʻutuʻu ko ení, ʻoku tau ʻamanekina ʻa e moveuveu fakapolitikale, tautoitoi pea mo e fakautuutu ʻo e taú. (Fkh. 6:4) ʻE lava fēfē ke tau mateuteu ki ha ngaahi pole ʻi he kahaʻú?

• Mateuteu fakalaumālie: Kumi ke ʻiloʻi ʻa e ngaahi tefitoʻi moʻoni Fakatohitapu mo e ngaahi fakamatala, ʻe lava ke ne fakaivimālohiʻi hoʻo falala kia Sihova mo ʻene kautahá, pea ʻe lava ke tokoniʻi ai koe ke ke hanganaki tuʻu-ʻatā. (Pal. 12:5; jr 125-126 ¶23-24) Ko e taimi eni ke fakaivimālohiʻi ai ʻetau kaumeʻa mo e faʻahinga ʻi he fakatahaʻangá.​—1 Pita 5:7, 8

• Mateuteu fakaesino: Fokotuʻu ha palani ke ke nofo malu kapau ʻoku ʻikai malava ke ke mavahe mei ʻapi pea tokateu mo ha ngaahi tokonaki feʻunga. Mateuteu foki ke fokotuʻu ha palani ki he founga ke mavahe ai mei ʻapi, vakaiʻi ʻa e ngaahi meʻa ʻi hoʻo kato fetukutukú pea faʻo foki ai mo ha kofu nima mo ha meʻa maluʻi ki he fofongá pea mo ha paʻanga. Kumi ki ha founga ʻe lava ke ke fetuʻutaki ai ki he kau mātuʻá pea fakapapauʻi ʻoku nau ʻiloʻi ʻa e founga ke fetuʻutaki atu aí.​—ʻAi. 32:2; g 10/07 7, Puha.

Lolotonga ʻa e taimi moveuveú, tauhi maʻu ha taimi-tēpile fakalaumālie. (Fil. 1:10) Fakaʻehiʻehi mei he hiki mei he feituʻu ki he feituʻu tuku kehe ʻo kapau ʻe fiemaʻu. (Māt. 10:16) Vahevahe atu ki he niʻihi kehé ʻa e meʻakai mo e ngaahi tokoni kehé.​—Loma 12:13.

SIO ʻI HE VITIŌ ʻOKÚ KE MATEUTEU KI HA FAKATAMAKI? PEA TALI LEVA ʻA E NGAAHI FEHUʻI KO ENÍ:

• ʻE lava fēfē ke tokoniʻi kitautolu ʻe Sihova lolotonga ʻa e taimi fakatamakí?

• Ko e hā ha ngaahi meʻa ʻe lava ke tau fai ke tau hoko ai ʻo mateuteu?

• ʻE lava fēfē ke tau tokoni ki he niʻihi kuo uesia ʻe he fakatamakí?