Koeʻuhi ko ʻetau taʻehaohaoá ʻoku tau fāinga hokohoko ke mapuleʻi ʻetau ngaahi holí. Kapau te tau fai pē ʻa e meʻa ʻoku tau loto ki aí, ʻe mole meiate kitautolu ʻa e hōifua ʻa Sihová. Ko e fakatātaá, ʻoku mahuʻinga ange ki he niʻihi ʻa e meʻakaí, valá mo e nofoʻangá ʻi heʻenau ʻofa ki he ʻOtuá. Ko e niʻihi ʻoku nau talangataʻa ki he tuʻunga ʻa e ʻOtuá ʻaki ʻenau fakatōliʻa ʻenau holi ki he fehokotaki fakasino taʻetāú. (Loma 1:26, 27) Pea ʻoku ʻi ai mo e faʻahinga ʻoku nau fakaʻatā ʻa e niʻihi kehé, ke nau tākiekina kinautolu ke fai ʻa e meʻa ʻoku halá, koeʻuhí ʻoku nau loto ke tali kinautolu ʻe he niʻihi kehé.​—ʻEki. 23:2.

ʻE lava fēfē ke tau mapuleʻi ʻetau ngaahi holí? Kuo pau ke tau fai ʻetau lelei tahá ke tokangataha ki he ngaahi meʻa fakalaumālié. (Māt. 4:4) ʻOku totonu foki ke tau kōlenga kia Sihova ke ne tokoniʻi kitautolu ke mapuleʻi ʻetau ngaahi holí. Ko e hā hono ʻuhingá? Koeʻuhí ʻokú ne ʻiloʻi ʻa e meʻa ʻoku lelei taha kiate kitautolú, pea ʻokú ne ʻiloʻi ʻa e founga ke fakalato ai ʻetau holí.​—Saame 145:16.

SIO ʻI HE VITIŌ ʻOUA ʻE TUKU KE MAUMAUʻI ʻE HE IFÍ HOʻO MOʻUÍ, PEA TALI LEVA ʻA E NGAAHI FEHUʻI KO ENÍ:

• Ko e hā ʻoku ifi ai ʻa e kakai ʻe niʻihi?

• Ko e hā ʻe lava ai ke uesia koe ʻe he ifí?

• Ko e hā ʻoku kovi ai ʻa e ifí mo e ifi tapaka fakaʻuhilá?​—2 Kol. 7:1

• ʻE lava fēfē ke ke talitekeʻi ʻa e ifí naʻa mo hono tuku ʻosi iá?