Na‘e fekau ‘a Selemaia ke fakatokanga ki he kau Siú ‘o fekau‘aki mo e faka‘auha ‘oku tu‘unuku maí koe‘uhi ko ‘enau fakangalo‘i honau ‘Otuá ‘a Sihova. (Sel. 13:25) Na‘e anga-fēfē ‘a e a‘u e pule‘angá ki he tu‘unga fakalaumālie fakamamahi ko ení? Na‘e mole ‘a e tu‘unga fakalaumālie ‘o e ngaahi fāmili ‘Isilelí. ‘Oku hā mahino na‘e ‘ikai muimui ‘a e ngaahi ‘ulu ‘o e fāmilí ki he tataki ‘a Sihova na‘e lēkooti ‘i he Teutalōnome 6:5-7.

Ko e ngaahi fāmili ‘oku mālohi fakalaumālié ‘oku tokoni ia ki he tu‘uma‘u ‘etau ngaahi fakataha‘angá ‘i he ‘ahó ni. Ko e ngaahi ‘ulu ‘o e fāmilí ‘oku nau tokoni ki honau fāmilí ke nau manatua ‘a Sihova fakafou ‘i he polokalama Lotu Fakafāmili tu‘uma‘u mo mohu ‘uhinga. (Saame 22:27) Hili ‘a e sio ‘i he vitiō “These Words . . . Must Be on Your Heart”—Family Interviews, tali ‘a e ngaahi fehu‘i ko ení:

• ‘I he founga fē ‘oku lavame‘a ai ‘a e ngaahi fāmili ‘e ni‘ihi ‘i he fehangahangai mo e ngaahi pole anga-maheni ‘o e lotu fakafāmilí?

• Ko e hā ‘a e ngaahi tāpuaki ‘e ni‘ihi ‘i hono tauhi ha polokalama Lotu Fakafāmili tu‘uma‘u mo mohu ‘uhinga?

• ‘I he fai ‘a e lotu fakafāmilí, ko e hā ‘a e ngaahi pole ‘oku ou fehangahangai mo iá, pea ‘i he founga fē te u fekuki ai mo iá?