‘UHINGA ‘OKU MAHU‘INGA AÍ: ‘I he teuteu ‘a e kau ako Tohi Tapú, ‘oku faingofua ange ai ke nau mahino‘i mo manatu‘i ‘a e me‘a ‘oku tau ako‘i kiate kinautolú. Ko e lahi ange ‘enau mahino‘i mo manatu‘í, ko e vave ange ia ‘enau fakalakalaká. Na‘a mo e hili ‘a e papitaisó, ‘e fiema‘u ke nau teuteu ki he ngaahi fakatahá mo e ngāue fakafaifekaú koe‘uhi ke nau “hanganaki le‘o.” (Māt. 25:13) Ko ia ai, ko hono ‘ilo‘i ‘a e founga ke ako aí mo hono ma‘u ha founga ako tu‘uma‘u leleí ‘e ‘aonga ia kiate kinautolu ‘i he kotoa ‘enau mo‘uí. Mei he kamata‘angá pē, ‘oku totonu ke tau tokoni‘i ‘etau kau akó ke nau tō‘onga‘aki ‘a e teuteu ki he‘enau ako Tohi Tapú.

FOUNGA HONO FAI IÁ:

• Hoko ko ha fa‘ifa‘itaki‘anga lelei. (Loma 2:21) Teuteu ki he ako taki taha mo fakakaukau ki he tokotaha akó. (km 11/15 3) ‘Ai ke ne sio ki he lailaine ho‘o tohi akó

• Fakalototo‘a‘i ia ke ne teuteu. ‘I hono fakahoko pē ‘a e akó, ‘ai ke ne ‘ilo ko e teuteú ko ha konga ia ‘o e fokotu‘utu‘u ‘o e ako Tohi Tapú, pea fakamatala‘i ‘a hono ngaahi ‘aongá. ‘Oange ha ngaahi fokotu‘u ‘aonga ki he founga ‘e lava ke ne vahe‘i ai ha taimi mei he‘ene taimi-tēpilé ke ne teuteu aí. ‘Oku faka‘atā ‘e he kau faiako ‘e ni‘ihi ‘a e tokotaha akó ke ne ngāue‘aki ‘a e tohi ‘a e faiakó ‘oku ‘osi lailainé ‘i he lolotonga ‘o ha ako ke tokoni‘i ‘a e tokotaha akó ke sio ki hono ‘aongá. Fakaongoongolelei‘i ia ‘i he‘ene teuteú

• Fakahāhaa‘i kiate ia ‘a e founga ke teuteu aí. ‘I he kamatá, ‘e ngāue‘aki ‘e he kau faiako ‘e ni‘ihi ha taimi ako kakato ke fakahāhā ai ki he‘enau tokotaha akó ‘a e founga ke teuteu ai ki ha lēsoni