Neongo ko e Lao ‘a Mōsesé ‘oku ‘ikai ha‘isia ki ai ‘a e Kalisitiané, ko hono ongo fekau lahi tahá—ke ‘ofa ki he ‘Otuá pea ke ‘ofa ki hotau kaungā‘apí—‘okú ne kei fakahaa‘i mai ‘a e me‘a ‘oku fiema‘u ‘e Sihova meiate kitautolú. (Māt. 22:37-39) ‘Oku ‘ikai te tau ma‘u tukufakaholo ‘a e ‘ofa ko iá. Kuo pau ke fakatupulekina ia. ‘I he founga fē? Ko e founga mahu‘inga ‘e taha ko hono lau faka‘aho ‘a e Tohi Tapú. ‘I he‘etau fakakaukau atu ki he ngaahi tafa‘aki kehekehe ‘o e ‘ulungaanga ‘o e ‘Otuá ‘o hangē ko ia ‘oku fakahaa‘i mai ‘e he Tohi Tapú, ‘oku tau sio ai ki he “faka‘ofo‘ofa ‘o Sihová.” (Saame 27:4) Ko hono olá, ‘oku tupulaki ai ‘etau ‘ofa kiate iá pea ‘oku hoko lahi ange ai ‘etau fakakaukaú ‘o hangē ko ‘ene fakakaukaú. ‘Oku ue‘i ai kitautolu ke tau tauhi ‘a e ngaahi fekau ‘a e ‘Otuá, ‘o kau ai ‘a e fekau ke fakahāhā ‘a e ‘ofa feilaulau‘i-kita ki he ni‘ihi kehé. (Sione 13:34, 35; 1 Sio. 5:3) Ko ha fokotu‘u eni ‘e tolu ke ‘ai ai ‘etau lau Tohi Tapú ke fakamānako ange:

• Ngāue‘aki ‘a e siolotó, pea ngāue‘aki ho ngaahi ongo‘angá. Sioloto atu ‘okú ke ‘i ai. Ko e hā ‘okú ke sio, fanongo ki ai mo nāmu‘í? Ko e hā nai ‘a e ngaahi ongo‘i ‘a e fa‘ahinga ‘i aí?

• ‘Ai ke kehekehe ho‘o fakafeangaí. Ko e ngaahi fokotu‘u eni ‘e ni‘ihi: Lau le‘o-lahi, pe muimui ‘i he lolotonga ho‘o fanongo ki ha hiki-le‘o. Lau le‘o-lahi ‘o fekau‘aki mo ha tokotaha pau ‘i he Tohi Tapú pe tu‘unga-lea kae ‘ikai ko hono lau fakahokohoko ha ngaahi vahe. Ko e fakatātaá, ngāue‘aki ‘a e Fakamatala Fakalahi A7 pe E12 ‘i he Liliu Tohi Tapu ‘o e Māmani Fo‘oú ‘o e Tohi Tapu Mā‘oni‘oní ke lau ai fekau‘aki mo Sīsū. Lau ‘a e fo‘i vahe fakakātoa ‘oku to‘o mei ai ‘a e potu tohi faka‘ahó. Lau ‘a e ngaahi tohi ‘i he Tohi Tapú ‘i he hokohoko na‘e hiki ai kinautolú.

• Lau ke mahino‘i. Ko hono lau ha fo‘i vahe ‘e taha ‘i he ‘aho taki taha ke mahino‘i pea fakalaulauloto ki aí ‘oku lelei ange ia ‘i hono lau ha ngaahi vahe lahi ke ‘osiki ‘a e fakamatalá. Fakakaukau ki he taimí mo e feitu‘ú. Sivisivi‘i ‘a e ngaahi fakaikiikí. Ngāue‘aonga‘aki ‘a e ngaahi mapé mo e ngaahi ma‘u‘anga fakamatala he tafa‘akí. Kumi ‘o ‘ikai toe si‘i hifo ‘i ha fo‘i poini ‘e taha ‘a ia ‘oku ‘ikai te ke mahino‘í. ‘O ka malava, fakamoleki ‘a e meimei taimi tatau ke ke fakalaulauloto ai ‘i ho‘o lau iá.