Ko e ngaahi tataki fakaemamatá ‘okú ne tohoaki‘i ‘a e tokanga ‘a e tokotaha ‘oku akó ke ne mahino‘i mo manatu‘i ‘a e me‘a na‘á ne akó. Ko hotau Faiako Ma‘ongo‘ongá, ‘a Sihova ‘okú ne ngāue‘aki ke ako‘i ‘a e ngaahi tokoni ki he mamatá ke ako‘i ha ngaahi lēsoni mahu‘ingá. (Sēn. 15:5; Sel. 18:1-6) Na‘e fai pehē pē mo Sīsū ko e Faiako Lahí. (Māt. 18:2-6; 22:19-21) Ko e founga ‘e taha ‘o e tokoni ki he mamatá, kuo fakamo‘oni‘i ‘oku ‘aonga lahi ‘i he ngaahi ta‘u ki mui ní ko e vitioó. ‘Okú ke ngāuelelei‘aki ‘a e ngaahi vitioó ‘i ho‘o ako‘i ho‘o kau ako Tohi Tapú?

Kuo teuteu‘i ha fo‘i vitiō ‘e hongofulu ke ne tokoni‘i kitautolu ‘i hono ako‘i ‘a e ngaahi lēsoni ‘i he polosiua Ongoongo Lelei mei he ‘Otuá! Ko e anga-mahení, ko e vitiō taki taha ‘oku fehoanakimālie ia mo e taha ‘o e ngaahi fehu‘i ‘oku tohi‘i mata‘ā‘ā ‘i he polosiuá. Ko e tatau faka‘ilekitulōniká ‘oku fakakau ai ‘a e link ‘okú ne fakamanatu mai ‘a e taimi ke hulu‘i ai ‘a e fo‘i vitiō taki taha. Tānaki atu ki aí, ko ha ngaahi vitiō ki he ngaahi fakamatala fakalahi ki he ‘ū tohi akó ‘oku ‘i he‘etau Puha Me‘angāue Fakafaiako.

‘Okú ke lāulea ‘i ha kaveinga mei he Tohi Tapú ‘e faingata‘a nai ki ho‘o tokotaha akó ke ne mahino‘i? Pe ‘oku fekuki ho‘o tokotaha akó mo ha ‘ahi‘ahi pau? Kumi ha ngaahi vitiō ‘i he jw.org® mo e JW Broadcasting® ke ma‘u ‘a e vitiō ‘e fe‘ungamālie mo iá. Mahalo ‘e lava ke ke sio fakataha mo ho‘o tokotaha akó ‘i ha taha ‘o e vitioó pea lāulea ki ai.

‘I he māhina taki taha, ‘oku tukuange atu ai ha ngaahi vitiō fo‘ou. ‘I ho‘o sio aí, fakakaukau ki he founga ‘e lava ke ke ngāue‘aki kinautolu ke ako‘i ‘aki ‘a e ni‘ihi kehé.