Ko e Pāsova faka‘osi ‘a Sīsuú ‘e hoko ‘o mahu‘inga. Koe‘uhí na‘e ofi ‘ene pekiá, na‘á ne fokotu‘utu‘u ke kai ‘a e houa kai ‘o e Pāsová mo ‘ene kau ‘apositoló pea ke fakahaa‘i ha kātoanga fo‘ou fakata‘u ‘a ia ko e Kai Efiafi ‘a e ‘Eikí. Ko ia na‘á ne fekau‘i ‘a Pita mo Sione ke na teuteu ‘a e lokí. (Luke 22:7-13; sio ki he fakatātā ‘i he peesi ‘uluakí.) ‘Oku fakamanatu mai heni ‘a e fiema‘u ke teuteu ki he Fakamanatú ‘i Ma‘asi 27. Ngalingali kuo fokotu‘utu‘u ‘e he ngaahi fakataha‘angá ha tokotaha malanga, ko e mā mo e uainé mo e ngaahi me‘a kehe. Kae kehe, ko e hā ‘e lava ke tau fai fakafo‘ituitui ke mateuteu ai ki he Fakamanatú?

Teuteu‘i ho lotó. Lau pea fakalaulauloto ki he Lau Tohi Tapu ki he Fakamanatú. ‘E lava ke ma‘u ha taimi-tēpile ‘i he Ko Hono Vakai‘i Faka‘aho ‘a e Tohi Tapú. ‘Oku ‘i ai ha taimi-tēpile fakaikiiki lahi ange ‘i he Fakamatala Fakalahi E12 ‘i he Liliu Tohi Tapu ‘o e Māmani Fo‘oú ‘o e Tohi Tapu Mā‘oni‘oní. (Sio foki ki he kupu ‘o ‘Epeleli 2020 ‘o e Polokalama Ngāue ki he Fakataha Mo‘uí mo e Ngāue Fakafaifekaú.) ‘E lava ke ma‘u ‘e he ngaahi fāmilí ‘a e fakamatala ki he mahu‘inga ‘o e huhu‘í, ‘i hono vakai‘i ‘a e Watch Tower Publications Index pe ko e Tataki Fakaefekumi Ma‘á e Kau Fakamo‘oni ‘a Sihová ke lāulea ki ai lolotonga ‘a e lotu fakafāmilí.

Fakaafe‘i ‘a e ni‘ihi kehé. Kau kakato ki he feingangāue tufa tohi fakaafé. Fakakaukau fekau‘aki mo e fa‘ahinga ‘e lava ke ke fakaafe‘í, hangē ko ha ngaahi toe ‘a‘ahi, ko ha ako Tohi Tapu ki mu‘a, ngaahi maheni pe ko ha kāinga. ‘Oku totonu ke fakapapau‘i ‘e he kau mātu‘á ke fakaafe‘i ‘a e fa‘ahinga ‘ikai longomo‘uí. Manatu‘i kapau ‘oku ‘i ai ha taha ‘oku ‘ikai nofo ‘i ho feitu‘ú, ‘e lava ke ke ma‘u ‘a e taimi mo e feitu‘u ki he Fakamanatú ‘i hono lomi‘i ‘a e FEKAU‘AKI MO KIMAUTOLU ‘i he peesi tefito ‘o e jw.org pea fili leva ‘a e “Fakamanatu.”

Ko e hā mo ha toe me‘a ‘e lava ke tau fai ke mateuteu aí?