ʻOku ʻi ai ʻetau vitiō ako Tohi Tapu ʻe fā ke ngāueʻaki ʻi he ngāue fakafaifekaú. Ko e hā ʻa e taumuʻa naʻe faʻu ki ai ʻa e vitiō taki taha?

• Ko e Hā ke Ako Ai ʻa e Tohi Tapú?—Vitiō Kakato naʻe fakataumuʻa ia ke ne ueʻi ʻa e mahuʻingaʻia ʻi he Tohi Tapú tatau ai pē pe ko e hā ʻa e tui fakalotu ha tokotaha. ʻOkú ne fakalototoʻaʻi ʻa e faʻahinga ʻe sio aí ke kumi ʻi he Tohi Tapú ʻa e tali ki he ngaahi fehuʻi lalahi ʻi he moʻuí pea ʻokú ne toe fakaʻali mai ʻa e ngaahi tali ʻaonga ʻoku maʻu aí. ʻOkú ne toe fakamatalaʻi ʻa e founga ke kole ha ako Tohi Tapu.

• Ko e Hā ke Ako Ai ʻa e Tohi Tapú? (vitiō nounou) ʻoku meimei tatau ia mo e vitiō kakató ka ʻoku toe kiʻi nounou ange ia. ʻE ʻaonga lahi nai ia ʻi he ngaahi feituʻu ngāue ʻoku femoʻuekina ai ʻa e kakaí.

• Ko e Hā ʻOku Fai ʻi ha Ako Tohi Tapu? naʻe fakataumuʻa ia ke ne ueʻi ʻa e mahuʻingaʻia ʻi heʻetau polokalama ako Tohi Tapu taʻetotongí pea tali ʻa e ngaahi fehuʻi anga-maheni ʻoku faʻa ʻeke fekauʻaki mo ia, hangē ko e founga ke kole ha ako.

• Talitali Lelei Koe ki Hoʻo Ako Tohi Tapú naʻe fakataumuʻa ia ke huluʻi ki he kau ako Tohi Tapú. Neongo ko e vitioó ʻoku fakafeʻiloaki mai ʻi he peesi ua ʻo e tohi Fiefia ʻi he Moʻuí ʻo Taʻengata! ʻe toe lava ke huluʻi ia ʻi he fetalanoaʻaki ʻi he polosiua Fiefia ʻi he Moʻuí ʻo Taʻengata! ʻOku ʻomai ʻe he vitioó ha fakanounou ʻo e meʻa ʻi loto ʻi he tohí pea mo e meʻa ʻe ʻamanekina ʻe he tokotaha akó lolotonga ʻa e fetalanoaʻakí.

Neongo ko e vitiō taki taha naʻe faʻu ki ha taumuʻa pau, ʻe lava ke huluʻi pe ʻave ki he kakaí ha niʻihi pē ʻo kinautolu ʻo ka feʻungamālie. ʻOku fakalototoʻaʻi ʻa e kau malangá ke nau hoko ʻo alāanga mo e ngaahi vitioó pea ngāueleleiʻaki ia ʻi he ngāue fakafaifekaú.