Ko e ngaahi fakatamaki fakanatulá ʻoku fakaʻaʻau ke hoko ʻo anga-maheni ange ʻi he ʻahó ni. ʻI he hoko ha fakatamaki, ko e ngaahi ngāue ke tokonaki ʻa e tokoní ʻoku fiemaʻu ke fokotuʻutuʻu maau pea fāitaha. ʻI he ʻuhinga ko iá, kuo fokotuʻutuʻu ʻe he Kulupu Pulé ke fokotuʻu ha Potungāue Tokoni Fakatamaki ʻi he ʻōfisi vaʻa kotoa pē.

ʻI hono ʻiloʻi ʻe he fanga tokoua ʻi he potungāue ko iá ʻoku hoko ha fakatamaki, ʻoku tuai-e-kemo ʻenau fetuʻutaki ki he kau mātuʻa fakalotofonuá ke ʻilo pe ko e hā e fiemaʻu ʻa e kau malangá. Kapau ko e maumaú ʻoku lahi ange ia ʻi he meʻa ʻoku malava ʻe he fanga tokoua fakalotofonuá ʻo fakaleleiʻí, ʻe vaheʻi leva ʻe he vaʻá ha fanga tokoua taau ke nau tataki ʻa e ngāue tokoní. ʻE kole nai ʻe he fanga tokoua ko iá ha kau ngāue pole pe ko ha ngaahi meʻa pau, pe te nau fakatau fakalotofonua nai ʻa e ngaahi tokoni ʻoku fiemaʻú pea tufaki atu.

ʻOku lahi ʻa e ngaahi lelei hono fakahoko ʻa e ngaahi meʻá ʻi he foungá ni. ʻOku fakaʻehiʻehi ai mei he toe fakalahi ʻa e ngāué, puputuʻú mo hono fakamoleki noa ʻa e paʻangá mo e naunaú, ʻa ia ʻoku faʻa hoko eni ʻi he fai pē ʻe he fanga tokouá ia ʻenau tokoni fakatāutaha.

Ko e fanga tokoua kuo fili ʻe he vaʻá te nau fakapapauʻi pe ko e hā ʻa e lahi ʻo e paʻanga ʻoku fiemaʻú pea pehē ki he tokolahi ʻo e kau ngāue pole ʻe fiemaʻu ki he tokoni fakatamakí. Te nau toe feinga foki ke maheni mo e kau maʻu mafai fakalotofonuá, ʻa ia ʻoku lava ke nau tokoniʻi kitautolu ke toe vave ange hono fai ʻetau ngāue tokoni fakatamakí. Ko ia ai, ʻoku totonu ke ʻoua ʻe tamuʻomuʻa ha taha ke fai ha tānaki paʻanga, ʻave ʻa e ngaahi naunau tokoni, pe ʻalu ki he feituʻu ʻoku uesiá tuku kehe ʻo ka toki kole ange ke nau fai pehē.

Kae kehe, ʻi he hoko ʻa e fakatamakí, ʻoku tau loto ke tokoni. (Hep. 13:16) ʻOku tau ʻofa ʻi hotau fanga tokouá! Ko e hā ʻe lava ke tau faí? Hiliō he meʻa kotoa, ʻe lava ke tau lotu maʻá e faʻahinga ʻoku maʻukovia ʻe he fakatamakí pea maʻa kinautolu ʻoku nau fai ʻa e tokoni fakatamakí. ʻOku toe lava foki ke tau fai ha tokoni fakapaʻanga ʻo fakafou ʻi he ngāue ʻi māmani lahí. ʻI he malumalu ʻo e tataki ʻa e Kulupu Pulé, ko e ngaahi ʻōfisi vaʻá ʻoku nau ʻiloʻi lelei ʻa e founga lelei taha ke ngāueʻaki ai ʻa e paʻanga tokoní. Pea kapau ʻoku tau loto ke kau ʻi he ngāue tokoní ʻe lava ke tau fakahaaʻi ʻoku tau faingamālie ʻaki hono fakafonu ʻa e foomu Local Design/Construction Volunteer Application (DC-50).

SIO ʻI HE VITIŌ TĀFEA FAKATUPU MAUMAU LAHI ʻI PELĒSILA, PEA TALI LEVA ʻA E FEHUʻI KO ENÍ:

Ko e hā ʻoku maongo kiate koe fekauʻaki mo e ngāue tokoni fakatamaki ʻa e Kau Fakamoʻoni ʻa Sihová hili ʻa e tāfea ʻi Pelēsila ʻi he 2020?