Ko e Fakamanatú ‘oku ‘omai ai kia kitautolu ha faingamālie lelei ke tapua atu ai ‘a e ngaahi tāpuaki ‘i he kaha‘ú ‘oku malava ia ‘i he huhu‘í, hangē ko e toetu‘ú. Na‘e ‘ikai ‘aupito fakataumu‘a ‘a Sihova ke mate ‘a e fa‘ahinga ‘o e tangatá. Ko e ‘uhinga ia ko e taha ‘o e ngaahi ongo‘i mamahi taha ‘oku tau hokosiá ko e mate ha taha ‘oku tau ‘ofa ai. (1 Kol. 15:26) Na‘e mamahi ‘a Sīsū ‘i he‘ene sio ki he‘ene kau ākongá ‘oku nau tangi ‘i he mate ‘a Lāsalosí. (Sione 11:33-35) ‘I he hoko ‘a Sīsū ko ha tokotaha ‘okú ne tapua haohaoa atu ‘ene Tamaí, ‘oku tau fakapapau‘i ai ‘oku mamahi foki mo Sihova ‘i he‘ene vakai mai ‘oku tau mamahi ‘i he mole atu ‘a e fa‘ahinga ‘oku tau ‘ofa aí. (Sione 14:7) ‘Oku fakatu‘otu‘a loto-vēkeveke ‘a Sihova ki he taimi te ne fakafoki mai ai ‘ene kau sevānití mei he maté pea ‘oku totonu ke pehē pē mo kitautolu.—Siope 14:14, 15.

Koe‘uhi ko Sihová ko e ‘Otua ‘o e fokotu‘utu‘u maau, ‘oku ‘uhinga lelei ai ke tui ko e toetu‘ú ‘e fakahoko ia ‘i ha founga maau. (1 Kol. 14:33, 40) ‘I he ‘ikai ke fakahoko ha putu, ko ha taimi ia ‘o e talitali lelei ‘a e fa‘ahinga te nau toetu‘u maí. ‘Okú ke fakalaulauloto ki he toetu‘ú, tautefito ki he ngaahi taimi ‘o e mamahí? (2 Kol. 4:17, 18) ‘Okú ke fakamālō kia Sihova ‘i hono tokonaki mai ‘a e huhu‘í mo hono fakae‘a mai ‘i he Tohi Tapú ‘e toe mo‘ui mai ‘a e kau maté?​—Kol. 3:15.

• Ko hai ‘i ho ngaahi kaungāme‘á mo e kāingá ‘oku tautefito ho‘o fakatu‘otu‘a atu ke toe sio ki aí?

• Ko hai ha taha ‘i he Tohi Tapú ‘oku tautefito ho‘o fakatu‘otu‘a atu ke fetaulaki mo talanoa mo ia?