Ko e akonakí ‘oku felāve‘i tefito ia ki he fakahinohino mo e ako‘i ka ‘oku toe kau ki ai ‘a e fakatonutonu mo e tautea. ‘Oku akonaki‘i kitautolu ‘e Sihova koe‘uhi ke tau lava ‘o lotu kiate ia ‘i he founga totonu. (Loma 12:1; Hep. 12:10, 11) ‘I he taimi ‘e ni‘ihi ‘oku fakamamahi ‘a e akonakí, ka ‘i he‘etau ngāue‘aki iá ‘oku tau hoko ‘o mā‘oni‘oni ‘i he vakai mai ‘a Sihova pea ma‘u ‘ene ngaahi tāpuakí. (Pal. 10:7) Ko e hā ‘oku totonu ke manatu‘i ‘e he fa‘ahinga ‘oku nau fai ‘a e akonakí mo ia ‘oku akonaki‘í?

Tokotaha fai akonakí. Hangē ko Sihová, ko e kau mātu‘á, ngaahi mātu‘á mo e ni‘ihi kehé, ‘oku nau feinga mālohi ke ‘oatu ‘a e akonakí ‘i he anga-lelei mo e anga-‘ofa. (Sel. 46:28) Na‘a mo hono ‘oatu ha akonaki fefeka ‘oku totonu ke ‘oatu ia ‘o fakatatau ki he tu‘ungá pea fai ia ‘i he ‘ofa.​—Tai. 1:13.

Tokotaha akonaki‘í. Tatau ai pē pe ko e hā ‘a e founga ‘oku ‘omai ai ‘a e akonakí ‘oku ‘ikai totonu ke tau taliteke‘i ia, kae feinga ke ngāue‘aki ia ‘i he taimi pē ko iá. (Pal. 3:11, 12) ‘Oku ‘omai ‘a e ngaahi akonakí ‘i he ngaahi founga kehekehe pea koe‘uhi ko hotau tu‘unga ta‘ehaohaoá ‘oku tau fiema‘u kotoa ai ‘a e akonakí. Te tau ma‘u nai ‘a e akonakí fakafou ‘i he me‘a ‘oku tau lau ‘i he Tohi Tapú pe fanongo ki ai ‘i he‘etau ngaahi fakatahá pe ko e ni‘ihi ‘oku nau fiema‘u ‘a e akonaki mei he kōmiti fakamāú. Kapau te tau tali ‘a e akonakí pea ngāue‘aki ia te tau ma‘u ha mo‘ui fiefia ange pea ma‘u ‘a e mo‘ui ta‘engatá.​—Pal. 10:17.

SIO ‘I HE VITIŌ “KO KINAUTOLU ‘OKU ‘OFA AI ‘A SIHOVÁ ‘OKÚ NE AKONAKI‘I,” PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē tupu hake ‘a Canon, pea ko e hā ‘a e liliu na‘e hokó?

• Ko e hā ‘a e akonaki anga-‘ofa na‘á ne ma‘u meia Sihová?

• Ko e hā ‘a e ngaahi lēsoni ‘oku tau ako mei he‘ene hokosiá?