Ko e ‘ofá ko e kulū ia ‘okú ne ha‘i fakataha ‘a e fāmilí. ‘I he ‘ikai ha ‘ofa, ‘e faingata‘a ki he fāmilí ke hanganaki fā‘ūtaha pea loto-lelei ke fengāue‘aki fakataha. ‘E lava fēfē ke fakahāhā ‘e he ngaahi husepānití, uaifí mo e mātu‘á ‘a e ‘ofa ‘i he fāmilí?

Ko ha husepāniti anga-‘ofa te ne tokanga ki he ngaahi fiema‘u hono uaifí, ko ‘ene ngaahi fakakaukau mo e ngaahi ongo‘í. (‘Ef. 5:28, 29) Te ne tokanga‘i ‘a e ngaahi fiema‘u fakamatelie hono fāmilí pea tokoni‘i kinautolu ke ‘unu‘unu ofi kia Sihova, ‘o kau ai hono tauhi ma‘u ha efiafi Lotu Fakafāmili tu‘uma‘u. (1 Tīm. 5:8) Ko ha uaifi anga-‘ofa te ne anganofo ki hono husepānití pea fakahāhā kiate ia ‘a e “faka‘apa‘apa loloto.” (‘Ef. 5:22, 33; 1 Pita 3:1-6) Kuo pau ki ha husepāniti mo ha uaifi ke na loto-lelei ke fefakamolemole‘aki. (‘Ef. 4:32) Ko ha ongo mātu‘a anga-‘ofa ‘okú na fakahāhā ‘a e mahu‘inga‘ia ‘i he‘ena fānaú taautaha pea ako‘i kinautolu ke ‘ofa kia Sihova. (Teu. 6:6, 7; ‘Ef. 6:4) Ko e hā ‘a e ngaahi pole ‘oku fehangahangai mo ‘ena fānaú ‘i he ‘apiakó? ‘Oku anga-fēfē fekuki ‘a e fānaú mo e tenge mei he to‘ume‘á? ‘I he hulu fau hono fakahāhā ‘a e ‘ofá ‘i loto ‘i he fāmilí ‘e ongo‘i malu ai ‘a e tokotaha kotoa.

SIO ‘I HE VITIŌ FAKAHĀHĀ ‘A E ‘OFA HE‘IKAI KA‘ANGÁ ‘I HO FĀMILÍ, PEA TALI LEVA ‘A E NGAAHI FEHU‘I KO ENÍ:

• ‘Oku anga-fēfē hono tauhi mo fakamahu‘inga‘i ‘e ha husepāniti anga-‘ofa hono uaifí?

• ‘Oku anga-fēfē hono fakahāhā ‘e ha uaifi anga-‘ofa ‘a e faka‘apa‘apa loloto ki hono husepānití?

• ‘Oku anga-fēfē hono uhu‘i ‘e ha ongo mātu‘a anga-‘ofa ‘a e Folofola ‘a e ‘Otuá ki he‘ena fānaú?