Ko e tohi Teach Us mo e tohi Ako‘i ‘e he Tohi Tapú ‘okú na meimei tatau. Ko e ongo me‘angāue eni mei he‘etau puha me‘angāue fakafaiakó ‘oku tatau ‘a e tefito‘i mo‘oni ‘i aí mo fakahokohoko tatau. Kae kehe, ko e tohi Teach Us ‘oku faingofua ange ‘a e ngaahi lea mo e fakakaukau ‘oku ngāue‘aki ‘i aí. ‘Oku fa‘u ia ki he fa‘ahinga ‘oku faingata‘a ke nau mahino‘i ‘a e tohi Ako‘i ‘e he Tohi Tapú. ‘I he ‘ikai ke ‘i ai ha ‘apenitikí, ko e tohi Teach Us ‘oku ‘i ai ‘a e fakamatala ‘i he ngata‘angá ‘oku faingofua hono fakamatala‘i ‘i ai ha kupu‘i lea mo e fakakaukau ‘oku ‘i he vahe ko iá. Ko e ngaahi vahé ‘oku ‘ikai ‘i ai ha ngaahi fehu‘i talateu pe puha fakamanatu. ‘Ikai ko ia pē, ‘oku nau fakamulituku‘aki ‘a e ngaahi mo‘oni ‘i he Tohi Tapú ‘a ē na‘e fakamatala‘i ‘i he vahé. Hangē pē ko e tohi Ako‘i ‘e he Tohi Tapú, ko e tohi Teach Us ‘oku lava ke tu‘uaki ia ‘i ha fa‘ahinga taimi pē, neongo ‘oku ‘ikai tu‘uaki ia ‘i he lolotonga ‘o e māhiná. ‘I he founga fē ‘e lava ai ke tau ngāue‘aki ‘a e ngaahi tafa‘aki kehe ‘o e tohi Teach Us ‘i he fakahoko ‘o ha ako Tohi Tapu?

FAKAMĀ‘OPO‘OPO: Ko e tokolahi taha ‘o e kakaí, ‘oku nau anga ki he‘etau founga fakahoko ‘o e akó ‘aki hono lau ‘a e palakalafi ‘i he tohi Ako‘i ‘e he Tohi Tapú pea toki ‘eke ‘a e fehu‘í pea na‘e ola lelei ia. Kae kehe, fakakaukau atu kapau ko e tokotaha akó ‘oku ‘ikai fu‘u poto ia ‘i he lea ‘oku fakahoko ai ‘a e akó pe ‘oku ‘ikai lautohi lelei. ‘I he tu‘unga ko iá, te ke fili nai ke ngāue‘aki ‘a e tohi Teach Us. Hili iá, ‘e lava ke ngāue‘aki nai ‘a e fakamā‘opo‘opo ‘i he vahé ke tefito mei ai ‘a e akó pea fakalototo‘a‘i nai e tokotaha akó ke lau ‘a e vahe ko iá ‘iate ia pē. Ko e mo‘oni Fakatohitapu taki taha ‘oku fa‘a ako‘i ia ‘i ha miniti ‘e 15 nai. Koe‘uhi ko e ‘ikai ke fakakau ‘i he fakamā‘opo‘opó ‘a e fakaikiiki kotoa ‘o e vahé, kuo pau ki he faiakó ke teuteu lelei pea manatu‘i ‘a e tu‘unga ‘o e tokotaha akó. Kapau ‘oku fakahoko ‘e he faiakó ‘a e akó mei he vahé, ‘e ngāue‘aki leva ‘a e fakamā‘opo‘opó ko ha fakamanatu.

FAKAMATALA ‘I HE NGATA‘ANGÁ: Ko e ngaahi kupu‘i lea mo e fakakaukau ‘i he fakamatala ‘i he ngata‘angá ‘oku fakahokohoko lelei ia ‘o hangē ko ia ‘oku hā ‘i he vahé. ‘E fili nai ‘a e faiakó pe ‘e lāulea ki he fakamatala ‘i he ngata‘angá lolotonga ‘a e ako ‘i he tohi Teach Us.