‘I he fakakaukau atu ki he fakaofi mai ‘a e mamahi lahí, ko ‘etau ngāue fakamalangá ‘oku fakavavevave. (Pal. 24:11, 12, 20) Ke tokoni‘i ‘a e kakaí, ‘oku lava ke tau ngāue‘aki ‘a e ngaahi kaati fetu‘utakí ke taki ‘enau tokangá ki he Folofola ‘a e ‘Otuá mo ‘etau uepisaití. ‘Oku ‘i he kātí ha kouti ‘oku taki atu ki he vitiō Ko e Hā ke Ako Ai ‘a e Tohi Tapú? mo ha fakaafe ke kole ki ha toe fakamatala lahi ange pe ako Tohi Tapu. Ko e kakai ‘e ni‘ihi ‘oku ‘ikai ke nau hehema ke tali ha tohi ka ‘oku nau loto-lelei ke ‘a‘ahi ki he‘etau uepisaití. ‘Oua ‘e toumoua ke ‘oange ha kaati fetu‘utaki. Kae kehe, ‘oua ‘e tuku ha kaati fetu‘utaki ki he fa‘ahinga ‘oku ‘ikai ke nau fakahaa‘i ha mahu‘inga‘iá.

‘I ho‘o ngaahi ngāue anga-maheni faka‘ahó ‘e lava ke ke langa‘i e mahu‘inga‘ia ha taha ‘aki ho‘o pehē pē: “‘Oku ou loto ke ‘oatu ha me‘a kiate koe. Ko e kaati ko ení ‘e taki ai koe ki ha uepisaiti ‘oku ‘i ai ha fakamatala ta‘etotongi mo ha ngaahi vitiō ‘i he kaveinga kehekehe.” (Sione 4:7) Koe‘uhi ko e iiki ‘a e ngaahi kaati fetu‘utakí, ‘e lava nai ke ke fa‘o ha ngaahi kaati ke vahevahe mo ha ni‘ihi ‘i he faingamālie kotoa pē.