Ko e hā ‘a e ngaahi ‘ulungaanga ‘okú ke fakamahu‘inga‘i ‘i ho‘o kumi ki ha kaungāme‘a? Ngalingali ‘okú ke fakamahu‘inga‘i ‘a e mateaki, anga-lelei mo e nima-homo. ‘Oku fakahāhā kotoa eni ‘e Sihova. (‘Eki. 34:6; Ngā. 14:17) ‘Okú Ne fanongo mai ‘i he taimi ‘okú ke lotu ange ai kiate iá. ‘Okú Ne tokoni‘i koe ‘i ha taimi pē ‘okú ke fiema‘u aí. (Saame 18:19, 35) ‘Okú Ne fakamolemole‘i ho ngaahi fehālākí. (1 Sio. 1:9) He Kaume‘a fakaofo ē ko Sihova!

‘E lava fēfē ke ke hoko ko ha kaume‘a ‘o Sihova? Ako fekau‘aki mo iá ‘aki ho‘o lau ‘ene Folofolá. Talanoa fekoekoe‘i mo ia. (Saame 62:8; 142:2) Fakahaa‘i ‘okú ke fakamahu‘inga‘i ‘a e me‘a ‘oku mahu‘inga kia Sihová hangē ko hono ‘Aló, ko hono Pule‘angá mo ‘ene ngaahi tala‘ofa ki he kaha‘ú. Talanoa ki he ni‘ihi kehé fekau‘aki mo iá. (Teu. 32:3) Kapau te ke fakatupulekina ha kaungāme‘a ofi mo Sihova te ne hoko ko ho‘o Kaume‘a ‘o ta‘engata.​—Saame 73:25, 26, 28.

SIO ‘I HE VITIŌ TO‘UTUPU​—“MOU ‘AHI‘AHI‘I KE MOU ‘ILO ‘OKU LELEI ‘A SIHOVA,” PEA TALI LEVA ‘A E NGAAHI FEHU‘I KO ENÍ:

• ‘E lava fēfē ke ke mateuteu ki he fakatapuí mo e papitaisó?

• ‘E lava fēfē ke tokoni‘i koe ‘e he ni‘ihi kehé ‘i he fakataha‘angá ke tauhi kia Sihová?

• ‘Oku anga-fēfē hono fakaivimālohi‘i ho vaha‘angatae mo Sihová ‘e he ngāue fakafaifekaú?

• Ko e hā ‘a e ngaahi ngāue ‘i he kautaha ‘a Sihová ‘e lava ke ke fakahokó?

• Ko e hā ‘a e me‘a ‘okú ke ‘ofa ai ‘ia Sihová?