Na‘e talaki ‘e Sīsū “‘a e ongoongo lelei ‘o e Pule‘anga ‘o e ‘Otuá.” (Luke 4:43) Na‘á ne ako‘i foki ‘a e kakaí ke nau lotu ke hoko mai ‘a e Pule‘anga ko iá. (Māt. 6:9, 10) ‘I Nōvema te tau fai ha feingangāue makehe ke fanongonongo ‘a e Pule‘anga ‘o e ‘Otuá. (Māt. 24:14) Fokotu‘utu‘u ho‘o taimí ke kau kakato ‘i he feingangāue ko ení. Ko e fa‘ahinga kotoa ‘e tāimu‘a tokoní ‘e lava ke nau fili ke ngāue houa ‘e 30 pe 50 ‘i he māhina ko ení.

Vahevahe ha konga Tohi Tapu fekau‘aki mo e Pule‘anga ‘o e ‘Otuá ki he lahi taha ‘o e kakai ‘i ho‘o feitu‘u ngāué. ‘I ho fili ha konga Tohi Tapu, fakakaukau ki he puipuitu‘a fakalotu ‘a e tokotaha ‘okú ke malanga ki aí. Kapau ‘e fakahāhā ha taha ‘a e mahu‘inga‘ia ‘i he ‘uluaki ‘a‘ahí ‘oange kiate ia ha tatau ‘o e Taua Le‘o Fika 2, 2020. Feinga ke toe talanoa ki he tokotaha mahu‘inga‘iá ‘i he vave tahá pea feinga ke kamata ha ako Tohi Tapu ‘o ngāue‘aki ha tohi mei he‘etau Puha Me‘angāue Fakafaiakó. ‘Oku toe si‘i pē ‘a e taimi ‘oku toé ki mu‘a ke laiki ‘e he Pule‘anga ‘o e ‘Otuá ‘a e ngaahi founga pule kotoa pē ‘oku fakafepaki kiate iá. (Tan. 2:44; 1 Kol. 15:24, 25) Ko ia ai, ‘ofa ke tau ngāuelelei‘aki ‘a e faingamālie makehe ko ení ke fakahaa‘i ‘etau poupou kia Sihova mo hono Pule‘angá!