‘Oku ma‘u ‘e he Kau Fakamo‘oni ‘a Sihová ha monū makehe. ‘I he tu‘unga ko ha Kalisitiane fakatapui ‘osi papitaisó ‘oku tau hokohoko atu ke fakatupulekina ha vaha‘angatae fekoekoe‘i mo fakafo‘ituitui mo e ‘Eiki Hau ko Sihová. Kuó Ne tohoaki‘i kitautolu kiate ia fakafou ‘i hono ‘Aló. (Sione 6:44) ‘Okú Ne fanongo mai ki he‘etau ngaahi lotú.​—Saame 34:15.

‘E lava fēfē ke tau malu‘i ‘a hotau vaha‘angatae mahu‘inga mo e ‘Otuá? Ko e me‘a ‘e taha, kuo pau ke tau faka‘ehi‘ehi mei he ‘alunga angahala‘ia na‘e fai ‘e he kau ‘Isilelí. Na‘a nau fakahoko ha fuakava makehe mo Sihova. Hili ha taimi si‘i mei ai, na‘a nau ngaohi ha ki‘i pulu koula pea hoko ai ‘o tauhi ‘aitoli. (‘Eki. 32:7, 8; 1 Kol. 10:7, 11, 14) Te tau ‘eke hifo nai: ‘‘Oku anga-fēfē ‘eku fakafeangai ki ha ‘ahi‘ahi? ‘Oku hā mei he‘eku ngaahi ngāué ‘oku ou fakamahu‘inga‘i ‘a hoku vaha‘angatae mo Sihová?’ Ko e ‘ofa loloto ki he‘etau Tamai fakahēvani te ne tokoni‘i kitautolu ke tau hola mei ha me‘a ‘okú ne fehi‘a ai.​—Saame 97:10.

SIO ‘I HE VITIŌ MALU‘I HO VAHA‘ANGATAE MO SIHOVÁ (KOL. 3:5), PEA TALI LEVA ‘A E NGAAHI FEHU‘I KO ENÍ:

• Ko e hā ‘a e mānumanu?

• Ko e hā ‘oku totonu ai ke tau taliteke‘i ‘a e mānumanú mo e tauhi ‘aitolí?

• ‘Oku anga-fēfē felāve‘i ‘a e fe‘auakí mo e tauhi ‘aitolí?

• Tautefito ki he fa‘ahinga ‘oku nau ma‘u ‘a e ngaahi fatongia ‘i he fakataha‘angá, ko e hā ‘oku totonu ai ke nau tokanga ki he ngaahi fiema‘u ‘a honau hoa malí?