Sioloto atu ‘okú ke mo‘ui ‘i Kāleli ‘i he taimi ‘o Sīsuú. ‘Okú ke fononga ki Selusalema ke kātoanga‘i ‘a e Kātoanga Falelou‘akaú. ‘Oku fihitu‘u ‘a e koló ‘i he ngaahi kaungālotu ‘oku nau fononga mama‘o maí. ‘Okú ke loto ke ‘oatu ha feilaulau kia Sihova. Ko ia ‘okú ke ‘ave ha kosi, ‘okú ke kamata fononga atu ‘i he fihitu‘u ‘a e koló ke a‘u ki he temipalé. ‘I ho‘o a‘u atú, ‘oku fonu ‘a e temipalé ‘i he ni‘ihi kehe ‘oku nau loto mo kinautolu ke fai ha feilaulau. ‘Oku hoko mai leva ‘a e taimi ke ke ‘oatu ai ho‘o kosí ki he kau taula‘eikí. ‘I he mōmeniti ko iá ‘okú ke manatu‘i hake hao tokoua, ‘oku ‘i he fu‘u kakaí nai pe ‘i he koló, ‘oku ‘i ai ‘a e me‘a ‘okú ne ‘ita ai ‘iate koe. ‘Oku fakamatala‘i mai ‘e Sīsū ‘a e me‘a ‘oku totonu ke ke faí. (Lau ‘a e Mātiu 5:24.) ‘E lava fēfē ke ke tuli mo ho tokoua loto-mamahí ki he melinó ‘o hangē ko ia ‘oku tala mai ‘e Sīsuú? ‘I he ongo lisi ‘i laló, faka‘ilonga‘i ‘a e tali ‘oku tonú.

‘OKU TOTONU KE KE . . .

• lea ki ho tokouá ‘o kapau pē ‘okú ke fakakaukau ‘okú ne ma‘u ha ‘uhinga lelei ki he‘ene loto-mamahí

• feinga ke fakatonutonu ‘a e fakakaukau ho tokouá kapau ‘okú ke pehē ‘okú ne fu‘u ‘ita vave pe ‘oku ‘i ai ‘ene kaunga ki he palopalemá

• fanongo anga-kātaki ‘i he lea mai ho tokouá, pea neongo kapau ‘oku ‘ikai te ke mahino‘i kakato, kole fakamolemole loto-mo‘oni ki ho‘o fakalotomamahi‘i iá pe ko ha ngaahi nunu‘a kuo hoko ka na‘e ‘ikai te ke taumu‘a pehē

‘OKU TOTONU KI HO TOKOUÁ KE NE . . .

• kumi ki ha poupou ‘a e ni‘ihi ‘i he fakataha‘angá ‘aki hono tala kiate kinautolu ‘a ho‘o me‘a na‘á ke fai ange kiate iá

• ngāhi‘i koe, fakamanatu ‘a e fakaikiiki kotoa ‘o e palopalemá, pea ke ke fakahaa‘i ko koe ‘oku halá

• ‘ilo‘i ‘a e anga-fakatōkilalo mo e loto-to‘a na‘e fiema‘u kiate koe ke ke fakaofiofi ai kiate iá, pea fakamolemole‘i loto-lelei koe mei hono lotó

Neongo ‘oku ‘ikai kau ‘i he‘etau lotu ‘i he ‘aho ní ha feilaulau monumanu, ko e hā na‘e ako‘i mai ‘e Sīsū ‘o fekau‘aki mo e kaunga ‘a e melino mo hotau tokouá ki he fakahōifua ‘etau lotu ki he ‘Otuá?