Kapau ko ha to‘utupu te‘eki papitaiso pe ko ha ako Tohi Tapu koe, ‘oku ‘i ai ha‘o taumu‘a ke papitaisó? Ko e hā ‘a e ‘uhinga lelei ‘okú ke loto ai ke papitaisó? Ko e fakatapuí mo e papitaisó ko e kamata‘anga ia ‘o ha vaha‘angatae makehe mo Sihova. (Saame 91:1) ‘E lava ke fakahaofi ai kitautolu. (1 Pita 3:21) ‘E lava fēfē ke ke a‘u ki he fakatapuí mo e papitaisó?

Fakamo‘oni‘i kiate koe ko e mo‘oní eni. ‘I he ‘i ai ha‘o ngaahi fehu‘í fai ha fekumi fakafo‘ituitui. (Loma 12:2) Fai ‘a e ngaahi liliu pē ‘oku fiema‘ú. ‘I ho‘o fai iá fakapapau‘i ko ho taumu‘á ia ke fakahōifua‘i ‘a Sihova. (Pal. 27:11; ‘Ef. 4:23, 24) Lotu ma‘u pē kiate ia ki ha tokoni. Hoko ‘o tuipau ‘e fakaivimālohi‘i mo poupou‘i koe ‘e Sihova ‘aki hono laumālie mā‘oni‘oni mālohí. (1 Pita 5:10, 11) Ko ha me‘a pē ‘okú ke fai ‘oku tuha ia mo e feingá. Ko e tauhi kia Sihová ‘a e mo‘ui fakafiefia tahá!​—Saame 16:11.

SIO ‘I HE VITIŌ KO E ‘ALUNGA KE FOU AI KI HE PAPITAISÓ, PEA TALI LEVA ‘A E NGAAHI FEHU‘I KO ENÍ:

• Ko e hā ‘a e ngaahi fakafaingata‘a‘ia‘anga kuo iku‘i ‘e he ni‘ihi ke hoko ‘o papitaiso?

• ‘E lava fēfē ke ke fakatupulekina ‘a e tui ‘oku fiema‘ú ke fakatapui ai koe kia Sihová?

• Ko e hā ‘a e me‘a kuo ue‘i ‘a e ni‘ihi ke taau ki he papitaisó?

• ‘Oku anga-fēfē hono tāpuaki‘i ‘e Sihova ‘a e fa‘ahinga ‘oku fili ke tauhi kiate iá?

• ‘Oku ‘uhinga ki he hā ‘a e fakatapuí mo e papitaisó?