‘Oku vakai ‘a Sihova ki he fuakava malí ko ha me‘a mafatukituki. Na‘á ne folofola kuo pau ki ha husepāniti mo ha uaifi ke na ma‘u ha ha‘i mālohi. (Māt. 19:5, 6) ‘Oku ‘i ai ‘a e ngaahi nofo mali fiefia ‘i he kakai ‘a e ‘Otuá. Kae kehe, ‘oku ‘ikai ha nofo mali ia ‘oku haohaoa. ‘E ‘i ai ‘a e ngaahi palopalema. ‘Oku ‘ikai totonu ke tau ma‘u ‘a e vakai anga-maheni ko e mavaé mo e veté ‘a e tali ki he ngaahi palopalema ‘i he nofo malí. ‘Oku lava fēfē ke malu‘i ‘e he kau Kalisitiané ‘enau nofo malí?

Fakakaukau ki he ngaahi poini mahu‘inga ‘e nima.

1. Malu‘i ho lotó ‘aki hono taliteke‘i ‘a e ngaahi me‘a hangē ko e fakamalinga mo e fakafiefia ta‘etāú, ‘a ia te ne fakavaivai‘i ha nofo mali.​—Māt. 5:28; 2 Pita 2:14.

2. Fakaivimālohi‘i ho vaha‘angatae mo e ‘Otuá pea fakalahi ho‘o holi ke fakahōifua‘i ia ‘i ho nofo malí.​—Saame 97:10.

3. Hokohoko atu hono ‘ai ‘a e anga‘itangata fo‘ou. Fai ‘a e fanga ki‘i ngāue anga-‘ofa ‘e ‘ai ai ke fiefia ho hoa malí.​—Kol. 3:8-10, 12-14.

4. Tauhi ma‘u ‘a e fetu‘utakí ‘i he anga-faka‘apa‘apa mo mohu ‘uhinga.​—Kol. 4:6.

5. Fakahoko ‘a e ngaahi fiema‘u fakaefehokotaki fakasinó ‘i he fakaalaala mo e ‘ofa.​—1 Kol. 7:3, 4; 10:24.

‘I he faka‘apa‘apa‘i ‘e he kau Kalisitiané ‘a e nofo malí ‘oku nau fakalāngilangi‘i ai ‘a e Tokotaha-Fakatupu ‘o e nofo malí, ‘a Sihova.

SIO ‘I HE VITIŌ KUO PAU KE TAU “LELE FAKATAHA MO E KĀTAKI”​—TALANGOFUA KI HE NGAAHI TU‘UTU‘UNI ‘O E FE‘AUHÍ, PEA TALI LEVA ‘A E NGAAHI FEHU‘I KO ENÍ:

• Neongo ‘e kamata lelei ha nofo mali, ka ko e hā nai ‘a e ngaahi pole ‘e malanga haké?

• ‘E lava fēfē ke tokoni ‘a e ngaahi tefito‘i mo‘oni Fakatohitapú ki he fa‘ahinga ‘oku nau ongo‘i kuo uesia ‘enau nofo malí?

• Ko e hā ‘a e ngaahi lao kuo fokotu‘u ‘e Sihova ki he nofo malí?

• Ke hoko ‘o lavame‘a ‘a e nofo malí ko e hā kuo pau ke fai ‘e he ongo me‘a malí?