Ko e hā ‘a e ngaahi palopalema ‘okú ke fa‘a fehangahangai mo iá? Ko ha ‘ulu koe ‘o e fāmilí ‘okú ke feinga ke tokanga‘i ha ngaahi fatongia lahí? Ko ha mātu‘a ta‘ehoa koe ‘okú ke feinga ke tokonaki ma‘a ho fāmilí? Ko ha to‘utupu koe ‘oku fakamamahi‘i ‘e ho‘o to‘ume‘á ‘i he ‘apiakó? ‘Okú ke puke ‘i ha mahaki pe hoholo ke ta‘umotu‘a angé? ‘Oku ‘i ai pē ‘a e palopalema ‘a e tokotaha kotoa. Ko e tokolahi ‘o e kau Kalisitiané ‘oku taulōfu‘u ‘a e ngaahi faingata‘a ‘oku nau fekuki mo iá. Kae kehe, ‘oku tau ‘ilo kuo vavé ni ke fakatau‘atāina‘i kitautolu mei he ngaahi me‘a fakamamahi ko ení.​—2 Kol. 4:16-18.

Ka ‘i he taimi ní, ‘oku tau ma‘u ‘a e fiemālie ‘i he ‘ilo‘i ‘oku mahino‘i ‘e Sihova ‘etau ngaahi palopalemá, fakamahu‘inga‘i ‘etau mateakí mo e kātakí, pea te ne tāpuaki‘i lahi kitautolu ‘i he kaha‘ú. (Sel. 29:11, 12) Pehē foki, ‘oku mahu‘inga‘ia fakafo‘ituitui ‘a Sīsū ‘iate kitautolu. ‘I he‘etau fakahoko ‘etau ngaahi ngafa faka-Kalisitiané ‘oku tau ma‘u ‘a e fiemālie ‘i he‘ene pehē: “‘Oku ou ‘iate kimoutolu.” (Māt. 28:20) ‘I he‘etau fakalaulauloto ki he tau‘atāina ‘i he kaha‘ú ‘i he Pule‘anga ‘o e ‘Otuá ‘oku tau fakaivimālohi‘i ai ‘etau ‘amanakí mo e loto-pau ke kātekina ha ngaahi ‘ahi‘ahi pē.​—Loma 8:19-21.

SIO ‘I HE VITIŌ ‘I HE OFI MAI ‘A E MATANGÍ, KE KE HANGANAKI TOKANGATAHA KIA SĪSŪ!​—NGAAHI TĀPUAKI ‘O E PULE‘ANGÁ ‘I HE KAHA‘Ú, PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē hoko ‘a e fa‘ahinga ‘o e tangatá ‘o mavahe mei he ‘Otuá? Ko e hā leva ‘a e nunu‘á?

• Ko e hā ‘a e kaha‘u ‘oku hanga atu ki ai ‘a e fa‘ahinga ‘oku faitōnunga kia Sihová?

• ‘Oku malava fēfē ke hoko ‘a e kaha‘u fakaofo ko iá?

• Ko e hā ‘a e ngaahi tala‘ofa ‘okú ke fakatu‘otu‘a atu ki ai ‘i he māmani fo‘oú?