‘Oku tau mo‘ui ‘i ha māmani ‘oku lau ‘a e leleí ko e kovi pea lau ‘a e koví ko e lelei. (‘Ai. 5:20) Ko e me‘a fakamamahí, ‘oku fai ‘e he kakai ‘e ni‘ihi ‘a e ngaahi me‘a ‘oku fehi‘a ai ‘a Sihová ‘o kau ai ‘a e tō‘onga ta‘etaau ‘i he vaha‘a ‘o ha tangata mo ha tangata pea mo ha fefine mo ha fefine. ‘E feinga nai ‘a e ngaahi to‘ume‘a ‘i he ‘apiakó pe ni‘ihi kehé ke tohoaki‘i ‘etau to‘utupu ‘ofeiná ke muimui kiate kinautolu. ‘E lava fēfē ke ke teu‘i ho‘o fānaú ke fekuki lavame‘a mo e ngaahi ‘ahi‘ahi ko ení?

Teu‘i ho‘o fānaú ‘aki ‘a e ‘ilo ki he ngaahi me‘a ‘oku fiema‘u mai ‘e Sihová. (Liv. 18:3) Hokohoko atu ho‘o ako‘i kinautolu ‘aki ‘a e me‘a ‘oku ako‘i ‘e he Tohi Tapú fekau‘aki mo e fehokotaki fakasinó, ‘o fakatatau ki honau ta‘umotu‘á mo e me‘a ‘e lava ke nau mahino‘í. (Teu. 6:7) ‘Eke hifo: ‘Kuó u ako‘i ‘eku fānaú fekau‘aki mo hono fakahāhā totonu ‘o e ‘ofá, mo e mahu‘inga ‘o hono tui ‘a e vala tāú, mo e fiema‘u ki he ni‘ihi kehé ke nau faka‘apa‘apa‘i ‘a ‘enau ngeia fakafo‘ituituí? ‘E ‘ilo ‘e he‘eku fānaú ‘a e me‘a ke faí kapau ‘oku feinga ha taha ke fakahāhā kiate kinautolu ha ‘ata fakalielia pe kole ange ke nau fai ha me‘a ‘oku pehē ‘e Sihova ‘oku hala?’ Ko e ‘ilo tokamu‘á ‘e tokoni‘i kinautolu ke faka‘ehi‘ehi mei he ngaahi palopalema lahi. (Pal. 27:12; Tml. 7:12) ‘I ho‘o ako‘i ho‘o fānaú ‘okú ke fakahaa‘i ai ‘a e ‘ofa ki ho‘o tofi‘a mahu‘inga meia Sihová.​—Saame 127:3.

SIO ‘I HE VITIŌ LANGA HA FALE ‘A IA ‘E TU‘ULOÁ​—MALU‘I HO‘O FĀNAÚ MEI HE “ME‘A ‘OKU KOVÍ,” PEA TALI LEVA ‘A E NGAAHI FEHU‘I KO ENÍ:

• Ko e hā ‘oku toumoua ai ‘a e ni‘ihi ke ako‘i ‘enau fānaú fekau‘aki mo e fehokotaki fakasinó?

• Ko e hā kuo pau ai ki he ngaahi mātu‘á ke ako‘i ‘enau fānaú “‘i he akonaki mo e enginaki ‘a Sihová”?​—‘Ef. 6:4

• Ko e hā ‘a e ngaahi me‘a kuo tokonaki mai ‘e he kautaha ‘a Sihová ke tokoni ki he ngaahi mātu‘á ke ako‘i ‘enau fānaú fekau‘aki mo e fehokotaki fakasinó?​—w19.05 12, puha

• Ko e hā kuo pau ai ke ke talanoa ma‘u pē mo ho‘o fānaú ki mu‘a ke nau fehangahangai mo ha me‘a mafatukituki?