Ko e hā ke mateuteu aí? Ko e ngaahi fiemaʻu fakafaitoʻo fakavavevavé mo e fiemaʻu fakafalemahakí ʻe lava ke hoko fakafokifā pea ʻikai ha fakatokanga. Ko ia ai, ki muʻa ke hoko ha meʻa fakavavevave, ngāueʻaongaʻaki ʻa e ngaahi tokonaki ʻoku ala maʻú ke tokoniʻi koe ke ke maʻu ʻa e tokoni fakafaitoʻo lelei taha ʻe ala lavá. ʻI hoʻo fai iá, ʻokú ke fakahaaʻi ai ʻa e fakaʻapaʻapa ki he moʻuí mo e lao ʻa Sihova fekauʻaki mo e totó.​—Ngā. 15:28, 29.

Ko e hā ʻe lava ke ke fai ke hoko ʻo mateuteú?

• Hili ʻa e lotu fakamātoato, fakafonu ʻa e kaati Fakahinohino ki he Tokangaʻi ʻo e Moʻuí (HCD). a Ko e kau malanga ʻosi papitaisó ʻe lava ke nau maʻu ʻa e kaati HCD mei he sevāniti tohí pea pehē foki ki he Kaati Fakaʻilonga maʻá e fānau īkí

• Kapau ʻokú ke feitama, kole ki hoʻo kau mātuʻá ha tatau ʻo e Information for Expectant Mothers (S-401). Ko e fakamatala ko ení te ne tokoniʻi koe ke fai ʻa e ngaahi fili lelei fekauʻaki mo e ngaahi meʻa fakafaitoʻo ʻe ala hoko lolotonga ʻa e feitamá mo e fāʻelé

• Kapau ʻe fiemaʻu kiate koe ha ngāue fakafaitoʻo ʻa ia ʻe fiemaʻu nai ki ai ʻa e totó pe tokoto falemahaki, ʻai ke ʻiloʻi tokamuʻa ia ʻe hoʻo kau mātuʻá pea fakahaaʻi ki he falemahakí ʻe ʻi ai ha ʻaʻahi atu mei ha faifekau ʻa e Kau Fakamoʻoni ʻa Sihová

ʻE lava fēfē ke tokoni ʻa e kau mātuʻá? Te nau tokoni atu ke fakafonu ʻa hoʻo kaati HCD. Kae kehe, heʻikai ke fai ʻe he kau mātuʻá ʻa e fili fakafaitoʻó maʻau pe fakahaaʻi atu ʻa e anga ʻenau fakakaukau fekauʻaki mo e ngaahi meʻa ʻoku fili fakafoʻituituí. (Loma 14:12; Kal. 6:5) ʻI hoʻo tala ange ki he kau mātuʻa fakalotofonuá ʻokú ke fehangahangai mo ha tuʻunga fakafaitoʻo ʻe kau nai ki ai ha toto, te nau fetuʻutaki leva he vave tahá ki he Kōmiti Fetuʻutaki Fakafalemahakí (HLC).

ʻE lava fēfē ke tokoni ʻa e HLC? ʻOku akoʻi ʻa e fanga tokoua ʻoku ngāue ʻi he HLC ke tokoniʻi ʻa e faʻahinga ʻi he tafaʻaki fakafaitoʻó mo e fakalaó ke nau mahinoʻi hotau tuʻunga fakalotu fekauʻaki mo e totó. ʻE lava ke nau lāulea fakataha mo hoʻo tokotaha tokoni fakafaitoʻó ki he ngaahi founga fakafaitoʻo ke fakaʻehiʻehi ai mei he huhu totó. Kapau ʻe fiemaʻu, ʻe lava ke nau tokoniʻi koe ke kumi ha toketā ʻe loto-lelei ke mo fengāueʻaki.

SIO ʻI HE VITIŌ FOUNGA KE FAI ʻA E NGAAHI FILI FAKAFAITOʻO FEKAUʻAKI MO E TOTÓ, PEA TALI LEVA ʻA E FEHUʻI KO ENÍ:

• Ko e hā naʻá ke ako mei he vitiō ko ení ʻa ia ʻe lava ke ne tokoniʻi koe ke mateuteu ki ha fiemaʻu fakafaitoʻo fakavavevave ʻe kau ki ai ʻa e totó?

  Ko Hoʻo Talí