Fu‘u Lahilahi Fakamatala: ‘Oua ‘e fakakaukau kuo pau ke ke fakamatala‘i e me‘a kotoa pē. Na‘e ngāue‘aki ‘e Sīsū ‘a e ngaahi fehu‘í ke tokoni‘i e kakaí ke fakakaukau pea a‘u ki he fakamulituku totonu. (Māt. 17:24-27) Ko e ngaahi fehu‘í ‘okú ne ‘ai ‘a e akó ke longomo‘ui pea tokoni‘i koe ke fakapapau‘i ‘a e me‘a ‘oku mahino‘i mo tui ki ai ho‘o tokotaha akó. (be 253 ¶3-4) ‘I hono ‘eke ha fehu‘i, anga-kātaki pē ‘o tatali ki he talí. Kapau ‘e hala ‘a e tali e tokotaha akó, toe ngāue‘aki ha fehu‘i taki ke a‘u ai ki he fakamulituku totonú kae ‘ikai ko hono tala ange ‘a e talí. (be 238 ¶1-2) Lea ‘i ha vave ‘oku faka‘atā ai ‘a e tokotaha akó ke mahino‘i ‘a e ngaahi fakakaukau fo‘oú.—be 230 ¶4.

‘Ai ke Fihi: Faka‘ehi‘ehi mei he fakatauele ko ia ke fakamatala‘i kotoa e me‘a ‘okú ke ‘ilo fekau‘aki mo e kaveingá. (Sione 16:12) Fakahanga taha pē ki he poini tefito ‘i he palakalafí. (be 226 ¶4-5) Ko e ngaahi fakaikiikí, na‘a mo e fakaikiiki ‘oku fakamānakó, ‘oku lava pē ke fakapuputu‘u‘i ai ‘a e ngaahi poini tefitó. (be 235 ¶3) Ko ‘ene mahino‘i pē ‘e he tokotaha akó ‘a e poini tefitó, hiki leva ki he palakalafi hokó.

‘Osiki Pē ‘a e Fakamatalá: Ko ‘etau taumu‘á ke a‘u ki he loto ‘o e tokotaha akó kae ‘ikai ko hono ‘osiki ‘a e fakamatalá. (Luke 24:32) Ngāue‘aki ‘a e mālohi ‘o e Folofola ‘a e ‘Otuá ‘o tokangataha ki he ngaahi konga Tohi Tapu tefito ‘i he lēsoní. (2 Kol. 10:4; Hep. 4:12; be 144 ¶1-3) Ngāue‘aki ha ngaahi talanoa fakatātā faingofua. (be 245 ¶2-4) Fakakaukau ki he pole fakafo‘ituitui ‘a e tokotaha akó mo ‘ene tuí, pea ‘ai ‘a e fakamatalá ke fehoanaki mo ia. ‘Eke ‘a e ngaahi fehu‘i hangē ko ení: “‘Oku fēfē ho‘o ongo‘i fekau‘aki mo e me‘a ‘okú ke ako ‘i hení?” “Ko e hā ‘oku ako‘i mai heni ‘o fekau‘aki mo Sihová?” “Ko e hā ‘a e lelei ‘okú ke ma‘u ‘i hono ngāue‘aki ‘a e akonaki ko ení?”—be 238 ¶3-5; 259 ¶1.