Kapau ‘oku ‘i he matapaá ha ki‘i leka, ‘oku totonu ke tau kole ke lea ki he‘ene ongo mātu‘á. ‘Oku fakahaa‘i ai ‘etau toka‘i hona tu‘unga ‘ulú. (Pal. 6:20) Kapau ‘oku fakaafe‘i kitautolu ‘e he ki‘i leká ke tau hū ange, ‘oku totonu ke tau ki‘i tatali. Kapau ‘oku ‘ikai faingamālie ‘a e ongo mātu‘á, ‘oku totonu ke tau toki foki ‘i ha taimi kehe.

Kapau ‘oku fu‘u lahi ‘a e ki‘i leká, mahalo nai ‘okú ne ‘i he ta‘u hongofulu tupú, ‘oku kei totonu pē ke ‘eke ‘ene ongo mātu‘á. Kapau ‘oku ‘ikai ke na faingamālie, te tau ‘eke ange pe ‘oku fakangofua he‘ene ongo mātu‘á ke ne fili pē ‘a e me‘a ‘okú ne fie laú. Kapau ko ia, ‘e lava ke tau tu‘uaki ha tohi pea fakahaa‘i ange ‘a e jw.org.

‘I hono fai ha toe ‘a‘ahi ki ha talavou na‘á ne fakahāhā ha mahu‘inga‘ia, ‘oku totonu ke tau kole ke lea ki he‘ene ongo mātu‘á. ‘Oku lava heni ke tau ma‘u ha faingamālie ke fakamatala ki he taumu‘a ‘etau ‘a‘ahí pea fakahaa‘i kiate kinautolu ‘a e falala‘anga ‘o e akonaki ‘oku ‘i he Tohi Tapú ki he ngaahi fāmilí. (Saame 119:86, 138) ‘I he‘etau fakahāhā ‘a e faka‘apa‘apa mo e faka‘atu‘i ki he ongo mātu‘á ko ha fakamo‘oni lelei ia pea malava ke tau ma‘u ai ha faingamālie ke vahevahe ‘a e ongoongo leleí mo e fāmilí.—1 Pita 2:12.