ʻI Nōvema te tau fai ai ha ngāue makehe ke vahevahe ʻa e ongoongo lelei ʻoku vavé ni ke fakafoʻou ʻa e māmaní. (Saame 37:10, 11; Fkh. 21:3-5) Feʻunuʻaki ho taimi-tēpilé ke kau kakato ki he feingangāue ko ení. Kapau ʻokú ke pole ke tāimuʻa tokoni ʻe lava ke ke fili ke ngāue houa ʻe 30 pe 50 ʻi he māhina ko ení.

Vahevahe ha konga Tohi Tapu ʻo fekauʻaki mo e māmani foʻoú ki he kakai tokolahi taha ʻe ala lavá. ʻI hoʻo fili ha konga Tohi Tapú fakakaukau ki he meʻa ʻe maongo ki he kakai ʻi ho feituʻu ngāué. Kapau ʻe fakahāhā ʻe ha taha ʻa e mahuʻingaʻia ʻi he ʻuluaki ʻaʻahí ʻoange kiate ia ha tatau ʻo e Taua Leʻo Fika 2 2021. Feinga ke toe talanoa ki he tokotaha mahuʻingaʻiá ʻi he vave tahá pea kamataʻi ha ako Tohi Tapu ʻo ngāueʻaki ʻa e polosiua Fiefia ʻi he Moʻuí ʻo Taʻengata! He fiefia ē ko ʻetau kau kakato ʻi hono vahevahe ʻa e “ongoongo lelei ʻo e meʻa ʻoku lelei angé”!​—ʻAi. 52:7.

SIO ʻI HE VITIŌ MĀMANI FOʻOU TEU KE HOKO MAÍ, PEA TALI LEVA ʻA E NGAAHI FEHUʻI KO ENÍ:

• Ko e hā ʻa e kahaʻu fakaofo ʻoku fakakaukauloto ki ai ʻa e kiʻi taʻahiné?

• Ko e hā ʻa e ngaahi meʻa ʻokú ke fakatuʻotuʻa atu ki ai ʻi he māmani foʻoú?

• ʻOku anga-fēfē hono ueʻi koe ʻe he fakalaulauloto ki hoʻo ʻamanakí ke kau kakato ʻi he feingangāue ʻi Nōvemá?​—Luke 6:45