‘Oku tala mai ‘e he Tohi Tapú ke tau fakafeangai ki he kau Kalisitiane ta‘umotu‘a angé ‘o hangē ia ko ‘etau ngaahi fa‘ē mo e ngaahi tamai pea ki he fa‘ahinga ta‘u iiki angé ‘o hangē ia ko hotau tuonga‘ane pe tuofefine. (Lau ‘a e 1 Tīmote 5:1, 2.) ‘Oku tautefito ki he fanga tokouá ‘a e fiema‘u ke nau fakafeangai ki he fanga tuofāfiné ‘aki ‘a e ngeia mo e faka‘apa‘apa.

‘Oku ta‘etotonu ki ha tokoua ke ne fakamalinga pe fai ha me‘a pē te ne ‘ai ha tuofefine ke ne ongo‘i ta‘efiemālie pe ta‘etoka‘i ia. (Siope 31:1) Ko ha tokoua ta‘emali, he‘ikai ke ne va‘inga ‘aki ‘a e ongo ‘o ha tuofefine ta‘emali ‘i hono ‘ai ia ke lōloa ‘ene mahaló.

‘Oku totonu ki he kau mātu‘á ke nau fanongo lelei ki he fanga tuofāfine ‘oku nau ‘eke anga-faka‘apa‘apa ha fehu‘i pe ‘ohake ha me‘a ‘oku fiema‘u ha tokanga makehe ki ai. ‘Oku toe ‘i ai ha fiema‘u makehe ki he kau mātu‘á ke nau tokangaekina ‘a e fa‘ahinga ‘oku ‘ikai ha‘anau husepāniti ke malu‘i kinautolu.​—Lute 2:8, 9.

SIO ‘I HE VITIŌ FAKAHĀHĀ ‘A E ‘OFA HE‘IKAI KA‘ANGÁ ‘I HE FAKATAHA‘ANGÁ​—KI HE KAU UITOÚ MO E TAMAI-MATÉ, PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē hono fakahāhā ‘e he fakataha‘angá ‘a e ‘ofa lahi kia Tuofefine Myint?

• Na‘e anga-fēfē ‘a e hoko ko ha fakamo‘oni lelei ki he ki‘i koló ‘a e ‘ofa na‘e fakahāhā ‘e he fakataha‘angá?

• Na‘e anga-fēfē maongo ki he ongo ‘ofefine ‘o Tuofefine Myint ‘a e ‘ofa na‘e fakahāhā ‘e he fanga tokouá?

Ko e hā ‘a e ngaahi me‘a ‘e lava ke ke fai ke fakahāhā ai ‘a e tokanga anga-‘ofa ki he fanga tuofāfine ‘i ho fakataha‘angá?