Ko e kaungāongo‘í ko ha malava ia ke mahino‘i ‘a e fakakaukau, ongo‘i, tu‘unga fakae‘ulungaanga mo e fiema‘u ‘a e ni‘ihi kehé. ‘Oku ‘ilo‘i ‘e he kakaí kapau ‘oku tau fakahāhā ‘a e kaungāongo‘i kiate kinautolu. Kapau ‘oku tau loto-mo‘oni ke tokoni‘i ‘a e ni‘ihi kehé ‘e faingofua ai ke tau fakahāhā ‘a e kaungāongo‘í kiate kinautolu. ‘I he‘etau fakahāhā ‘a e kaungāongo‘í ‘i he ngāue fakafaifekaú ‘oku tau fa‘ifa‘itaki ai ki he ‘ofa mo e tokanga ‘a Sihová pea ‘oku tohoaki‘i ai heni ‘a e kakaí kiate ia.​—Fil. 2:4.

‘Oku tau fakahāhā ‘a e kaungāongo‘í ‘o ‘ikai ngata pē ‘i he‘etau faiakó kae toe pehē foki ‘i he anga ‘o ‘etau fanongó mo ‘etau leá pehē foki ki he‘etau tō‘ongá, ngaue hotau sinó mo e fakafōtunga hotau matá. ‘Oku tau fakahāhā ‘a e kaungāongo‘í ‘aki ‘etau fakahaa‘i ‘a e mahu‘inga‘ia loto-mo‘oni ‘i ha tokotaha. ‘Oku tau mahu‘inga‘ia ‘i he me‘a ‘okú ne sai‘ia aí, ko ‘ene tuí mo ‘ene tu‘ungá. ‘Oku tau ‘oange ha fakamatala ‘aonga mo e tokoni kae ‘ikai fakamālohi‘i ia ke liliu. ‘I he tali ‘e he ni‘ihi kehé ‘etau tokoní ‘oku tupulaki ai ‘etau fiefia ‘i he ngāue fakamalangá.

SIO ‘I HE VITIŌ HOKOSIA ‘A E FIEFIA ‘I HE NGAOHI ĀKONGÁ​—FAKALELEI‘I HO‘O PŌTO‘Í​—FAKAHĀHĀ ‘A E KAUNGĀONGO‘I, PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē hono fakahāhā ‘e Nita ‘a e kaungāongo‘í ‘i he tōmui atu ‘a Losé?

• Na‘e anga-fēfē hono fakahāhā ‘e Nita ‘a e kaungāongo‘í ‘i he tala ange ‘e Lose ‘okú ne “fu‘u situlesi ‘aupito” ke fai ‘ene ako Tohi Tapú?

• Na‘e anga-fēfē hono fakahāhā ‘e Nita ‘a e kaungāongo‘í ‘i he tala ange ‘e Lose ‘oku ‘ikai te ne fu‘u maau ‘o hangē ko iá?