‘UHINGA ‘OKU MAHU‘INGA AÍ: ‘I he hangē ko e lahi taha ‘o e ngaahi me‘angāué, ‘oku lava ‘a e ngaahi netiueka fakasōsialé ke ‘aonga pe fakatupu maumau. ‘Oku fili ‘a e kau Kalisitiane ‘e ni‘ihi ke ‘oua te nau ngāue‘aki ‘a e ngaahi netiueka fakasōsialé. ‘Oku ngāue‘aki ‘e he kau Kalisitiane kehé ia ‘a e ngaahi netiueka fakasōsialé ke fetu‘utaki ai mo e fāmilí mo e ngaahi kaume‘á. Kae kehe, ‘oku fiema‘u ‘e he Tēvoló ke tau ngāue‘aki ta‘efakapotopoto ‘a e ngaahi netiueka fakasōsialé, ‘a ia ‘e lava ke ne maumau‘i hotau ongoongó mo hotau tu‘unga fakalaumālié. ‘I he hangē ko Sīsuú, ‘e lava ke tau ngāue‘aki ‘a e ngaahi tefito‘i mo‘oni mei he Folofola ‘a e ‘Otuá ke ‘ilo‘i ai ‘a e ngaahi fakatu‘utāmakí pea faka‘ehi‘ehi mei ai.—Luke 4:4, 8, 12.

NGAAHI TŌ‘ANGA KE FAKA‘EHI‘EHI MEI AI:

• Ko hono ngāue‘aki tōtu‘a ‘a e mītia fakasōsialé. Ko hono ngāue‘aki ‘a e ngaahi houa ta‘efa‘alaua ‘i he netiueka fakasōsialé pe mītia fakasōsialé ‘oku lava ke ne to‘o atu ‘a e taimi mahu‘inga ‘oku fiema‘u ki he ngaahi me‘a fakalaumālié

  Ngaahi tefito‘i mo‘oni ‘i he Tohi Tapú: ‘Ef. 5:15, 16; Fil.1:10

• Ko e mamata ‘i he me‘a ‘oku ala fehu‘iá. Ko e sio ‘i he ‘ata fakatauelé ‘oku taki atu ia ki hono ma‘unimā ‘e he ‘ata fakalieliá pe ‘ulungaanga ta‘etāú. Ko hono lau ‘a e me‘a mei ha taha kuo tafoki ‘o fakafepaki ki he mo‘oní pe mei he‘ene pēsí ‘oku lava ke ne maumau‘i ‘ete tuí

  Ngaahi tefito‘i mo‘oni ‘i he Tohi Tapú: Māt. 5:28; Fil. 4:8

• Ko hono fokotu‘u atu ha ngaahi fakamatala pe ngaahi tā ta‘etotonú. Koe‘uhi ‘oku kākā ‘a e lotó, ‘e hehema nai ha taha ke ne fokotu‘u atu ha fakamatala pe ha tā ta‘etotonu ‘i he netiueka fakasōsialé. Kae kehe, ‘e lava ke maumau‘i ‘e he me‘á ni ‘a e ongoongo ‘o ha taha pe ‘ai ia ke ne tūkia fakalaumālie

  Ngaahi tefito‘i mo‘oni ‘i he Tohi Tapú: Loma 14:13; ‘Ef. 4:29

SIO ‘I HE VITIŌ NGĀUE‘AKI FAKAPOTOPOTO ‘A E ‘INITANETÍ, PEA LĀULEA LEVA KI HE FOUNGA KE FAKA‘EHI‘EHI AI MEI HE NGAAHI TU‘UNGA KO ENÍ: