‘UHINGA ‘OKU MAHU‘INGA AÍ: Ko hono ako fakafo‘ituitui ‘a e Folofola ‘a e ‘Otuá ‘oku tokoni‘i ai kitautolu ke “mahino‘i kakato ‘a e fālahi mo e lōloa mo e mā‘olunga mo e loloto ‘o e mo‘oní.” (‘Ef. 3:18) ‘Oku tokoni‘i foki ai kitautolu ke tau nofo‘aki ta‘ehalaia mo ta‘ehamele ‘i he lotolotonga ‘o ha māmani fulikivanu pea ke hanganaki “piki ke ma‘u ki he folofola ‘o e mo‘uí.” (Fil. 2:15, 16) Ko hono ako fakafo‘ituitui ‘a e Folofola ‘a e ‘Otuá ‘oku faka‘atā ai kitautolu ke tau fili ha ma‘u‘anga fakamatala ‘a ia ‘oku tau fiema‘u tāutahá. ‘E lava fēfē ke tau ngāue‘aonga‘aki ‘a e lahi taha ‘o e taimi ‘oku tau ma‘u ke lau ai mo ako ‘a e Tohi Tapú?

FOUNGA HONO FAI IÁ:

• Faka‘ilonga‘i ‘a e ngaahi vēsí pea hiki mo ha nouti ‘i ho‘o Tohi Tapu ki he ako fakafo‘ituituí, pe ‘i ho‘o tohí tonu pe ko e tatau faka‘ilekitulōniká

• ‘Eke hifo kiate koe ‘a e ngaahi fehu‘i ko ení ‘i ho‘o lau ‘a e Folofola ‘a e ‘Otuá: ‘Ko hai? Ko e hā? ‘A fē? ‘I fē? Ko e hā hono ‘uhinga? Anga-fēfē?’

• Kumi ki he mo‘oni‘i me‘á. Ngāue‘aki ‘a e ngaahi me‘angāue fakaefekumi ‘oku ala ma‘ú, kumi ki he ngaahi tu‘unga-lea pe veesi Fakatohitapú

• Fakalaulauloto ki he me‘a ‘okú ke laú ke ‘ilo‘i ‘a e founga ke ngāue‘aki fakafo‘ituitui ai ‘a e fakamatalá

• Ngāue‘aki ‘a e me‘a ‘okú ke akó ‘i ho‘o mo‘ui faka‘ahó.—Luke 6:47, 48

SIO ‘I HE VITIŌ HANGANAKI “PIKI KE MA‘U”—FAKAFOU ‘I HE AKO FAKAFO‘ITUITUI OLA LELEI, PEA TALI LEVA ‘A E NGAAHI FEHU‘I KO ENÍ:

• Kuo anga-fēfē hono fakamatala‘i ‘e he ni‘ihi ‘a e ako fakafo‘ituituí?

• Ko e hā ‘oku totonu ai ke tau kamata‘aki ‘a e ako fakafo‘ituitui taki taha ‘aki ha lotú?

• Ko e hā te ne tokoni‘i kitautolu ke tau mahino‘i lelei ange ‘a e ngaahi konga Tohi Tapú?

• Te tau faka‘ilonga‘i fēfē ‘a ‘etau Tohi Tapu ki he ako fakafo‘ituituí?

• Ko e hā ‘oku mahu‘inga ai ‘a e fakalaulaulotó ‘i he‘etau ako ‘a e Folofola ‘a e ‘Otuá?

• Ko e hā ‘oku totonu ke tau fai ‘aki ‘a e me‘a kuo tau akó?