‘I he‘etau ngaahi fakataha‘angá ‘oku ‘i ai ‘a e ni‘ihi kuo nau tauhi kia Sihova ‘i he ngaahi laui ta‘u. ‘E lava ke tau ako mei he‘enau falala pau kia Sihová. ‘E lava ke tau ‘eke ange fekau‘aki mo e hisitōlia ‘o e kautaha ‘a Sihová pea mo e ngaahi pole na‘a nau fehangahangai mo iá pea iku‘i ‘i he tokoni ‘a Sihová. ‘E lava nai ke tau fakaafe‘i ha taha ‘o e si‘i fa‘ahinga ‘ofeina ko ení ke vahevahe mai ‘ene ngaahi hokosiá ‘i he‘etau efiafi Lotu Fakafāmilí.

Kapau ko ha Kalisitiane matu‘otu‘a koé, fakahaa‘i tau‘atāina ho‘o hokosiá ki he to‘utupu Kalisitiané. Ko Sēkope mo Siosifa na‘á na vahevahe ‘ena hokosiá ki hona hakó. (Sēn. 48:21, 22; 50:24, 25) Na‘e toe ‘amanekina ‘e Sihova ki he ngaahi ‘ulu‘i fāmilí ke nau ako‘i ‘enau fānaú fekau‘aki mo ‘ene ngaahi fu‘u ngāué. (Teu. 4:9, 10; Saame 78:4-7) ‘I hotau ‘ahó ni, ko e ngaahi mātu‘á mo e ni‘ihi kehe ‘i he fakataha‘angá, ‘e lava ke nau tala ki he to‘utupú ‘a e ngaahi me‘a fakaofo kuo nau sio ai kuo fakahoko ‘e Sihova ‘i he‘ene kautahá.

SIO ‘I HE VITIŌ TAUHI MA‘U ‘A E FĀ‘ŪTAHÁ LOLOTONGA ‘A E FAKATAPUTAPUÍ PEA TALI LEVA ‘A E NGAAHI FEHU‘I KO ENÍ:

• Na‘e anga-fēfē tokoni ‘a e va‘a ‘Aosituliá ki hotau fanga tokoua ‘i he ngaahi fonua na‘e tapui ai ‘etau ngāué?

• Na‘e anga-fēfē hono tauhi ke mālohi ‘a e tui ‘a e fanga tokouá ‘i he ngaahi fonua ko iá?

• Ko e hā na‘e fakamavahe‘i ai ‘e he fanga tokoua tokolahi ‘i Lumēnia kinautolu mei he kautaha ‘a Sihová, pea anga-fēfē ‘enau toe foki maí?

• ‘Oku anga-fēfē hono fakaivimālohi‘i ho‘o tuí ‘e he ngaahi hokosia ko ení?