‘Okú ke ‘i he vaha‘a ta‘u ‘o e 23 ki he 65 pea ngāue taimi-kakato kia Sihova? ‘Okú ke mo‘ui lelei pea malava ke ngāue ‘i ha feitu‘u pē ‘oku lahi ange ai ‘a e fiema‘ú? Kapau ko ho‘o talí ko e ‘io, kuó ke fakakaukau ke kole ke kau ki he Ako Ma‘á e Kau ‘Evangeliō ‘o e Pule‘angá? Talu mei he fuofua kalasí, ko e laui afe ‘o e fanga tokoua mo e fanga tuofāfine ta‘emalí mo e ngaahi hoa malí kuo nau tohi kole ki ai. Kae kehe, ‘oku fiema‘u lahi ‘a e fanga tokoua ta‘emalí ke tohi kole ki ai. Kole kia Sihova ke fakalahi ho‘o holi ke fai hono finangaló pea ke fa‘ifa‘itaki ki hono ‘Aló. (Saame 40:8; Māt. 20:28; Hep. 10:7) Fakakaukau leva ki he ngaahi founga ke fakasi‘isi‘i ai ho‘o ngāué pe fatongia fakafo‘ituitui kae lava ke ke taau ki ai.

Ko e hā ‘a e ngaahi faingamālie ‘o e ngāué kuo ma‘u ‘e he fa‘ahinga kuo nau kau ki he ako fakalaumālie ko ení? Kuo vahe‘i ‘a e ni‘ihi ‘o e kau akó ke ngāue ‘i he ngaahi feitu‘u ‘oku lea‘aki ai ‘a e ngaahi lea kehe pe kau ‘i he faifakamo‘oni makehe ‘i he ngaahi feitu‘u kakai ‘i he ngaahi kolo lalahí. Ko e kau ako ‘e ni‘ihi ‘oku nau hoko ko ha ‘ovasia sēketi tokoni, ‘ovasia sēketi pe ko ha misinale. ‘I ho‘o fakakaukau ki he me‘a ‘e lava ke ke fai ‘i he ngāue ‘a Sihová ‘ofa ke ke fakahāhā ‘a e tō‘onga tatau na‘e ma‘u ‘e he palōfita ko ‘Aiseá ‘a ia na‘á ne pehē: “Ko au eni! Fekau‘i au!”​—‘Ai. 6:8.

SIO ‘I HE VITIŌ KO E KAU MISINALÉ KO E KAU NGĀUE IA ‘I HE UTU-TA‘Ú, PEA TALI LEVA ‘A E NGAAHI FEHU‘I KO ENÍ:

• ‘Oku anga-fēfē hono fili ‘a e kau misinalé?

• Ko e hā ‘a e ngāue lelei ‘oku fai ‘e he kau misinalé?

• Ko e hā ‘a e ngaahi tāpuaki ‘e ni‘ihi ‘o e ngāue fakamisinalé?