Ko e Hā Kuo Hoko ki he Fakaʻapaʻapa ki he Fāmilí?
ʻUHINGA ʻOKU MAHUʻINGA AI ʻA E FAKAʻAPAʻAPA KI HE FĀMILÍ
ʻI he fakahāhā ʻe he husepānití, uaifí mo e fānaú ʻa e fakaʻapaʻapá ʻoku tokoni ia ki he melino mo e ongoʻi malu ʻa e fāmilí.
-
ʻOku pehē ʻe he tohi The Seven Principles for Making Marriage Work ʻi he taimi ʻoku fefakaʻapaʻapaʻaki ai ha ongo meʻa mali, ʻokú na fakahāhā ai ʻa e fetokangaʻakí “ʻo tatau ai pē ʻi ha meʻa lahi pe ʻi ha meʻa siʻi.”
-
ʻOku fakahaaʻi ʻe he ngaahi fakatotoló ko e fānau ʻoku nau ako ke fakaʻapaʻapa ki he niʻihi kehé ʻoku nau ongoʻi lelei ange ai, maʻu ha vahaʻangatae lelei mo ʻenau mātuʻá pea siʻi ange ʻenau fāinga mo e palopalema fakaeongo mo fakaeʻatamaí.
MEʻA ʻE LAVA KE KE FAÍ
Faʻu ha palani mo ho fāmilí. ʻUluakí, fakapapauʻi ʻokú ke mahinoʻi ʻa e ʻuhinga ʻo e “fakaʻapaʻapá.” Uá, tohiʻi hifo ʻa e ngaahi ʻulungaanga pau ʻoku ʻamanekina mei he tokotaha kotoa ʻi he fāmilí pea pehē ki he ngaahi ʻulungaanga ʻoku totonu ke fakaʻehiʻehi mei aí. Tolú, fetalanoaʻaki mo e fāmilí ki he palani ko iá koeʻuhi ke mou maʻu ha fakakaukau tatau.
Fokotuʻu ʻa e faʻifaʻitakiʻangá. ʻOkú ke fakaangaʻi ha mēmipa ho fāmilí ʻi heʻene fai ha fehālaaki, manukiʻi pe tukunoaʻi ʻene ngaahi fokotuʻú pea fakahohaʻasi ia ʻi heʻene talanoa atú?
Fokotuʻú: Fakaʻapaʻapaʻi ho hoá mo e fānaú ʻo tatau ai pē pe ʻoku nau tuha mo ia pe ʻikai.
Anga-fakaʻapaʻapa naʻa mo e ʻikai ke mo loto-tataú. ʻI hono fakahaaʻi hoʻo fakakaukaú, fakaʻehiʻehi mei he ngaahi lea hangē ko e “ʻokú ke pehē maʻu pē” pe “ʻoku ʻikai pē ke ke pehē.” Ko e ngaahi lea fakaanga fefeka pehē ki ha taha ʻi he fāmilí ʻe lava ke ne liliu ha taʻefelotoi siʻisiʻi ki ha fuʻu fepaki lahi.
MEʻA ʻOKU MAU FAÍ
ʻOku fakalototoʻaʻi ʻe he kau Fakamoʻoni ʻa Sihová ʻa e ngaahi mēmipa ʻo e fāmilí ke nau fefakaʻapaʻapaʻaki, ʻoku mau faʻa ʻai ia koe kaveinga ʻo e ngaahi kupu, ʻū tohi, polosiua, ʻū vitiō ʻoku mau pulusí, pea ʻoku taʻetotongi.
KI HE NGAAHI HOA MALÍ: Ko e kupu hokohoko Tokoni ki he Fāmilí ʻe lava ke tokoni ki he ngaahi husepānití mo e uaifí ke nau . . .
-
hoko ko e kau fanongo lelei
-
taʻofi ʻa e tauʻaki fakalongolongó
-
taʻofi ʻa e fekīhiakí
(Kumi ki he “Tokoni ki he Fāmilí” ʻi he jw.org)
KI HE MĀTUʻÁ: Ko e kupu hokohoko Tokoni ki he Fāmilí ʻe lava ke tokoni ki he ngaahi mātuʻá ke tokoniʻi ʻenau fānaú ke nau . . .
-
talangofua
-
tokoni ʻi he ngaahi ngāue fakaʻapí
-
lea “kātaki” mo “fakamālō”
(Kumi ki he “Tauhi ʻo e Fānaú” mo e “Tauhi ʻo e Kau Taʻu Hongofulu Tupú” ʻi he jw.org)
Sio foki ki he ʻapenitiki, “Questions Parents Ask,” ʻi he tohi Questions Young People Ask—Answers That Work, Volume 1. (Kumi ki he “Questions Parents Ask” ʻi he jw.org)
KI HE TOʻUTUPÚ: Ko e konga ʻi he jw.org ki he Toʻutupu ʻoku ʻi ai ngaahi kupu, vitiō mo e ngāue ke fai te ne tokoniʻi ʻa e toʻutupú ke nau . . .
-
ngāue fakataha mo ʻenau ngaahi mātuʻá mo e toenga ʻa e fānaú
-
talanoa ʻi he anga-fakaʻapaʻapa ki heʻenau ngaahi mātuʻá fekauʻaki mo e ngaahi tuʻutuʻuní
-
maʻu ʻa e falala ʻenau ngaahi mātuʻá
(Fekumi ki he “Toʻutupu” ʻi he jw.org)
ʻOku taʻetotongi hono ngāueʻaki ʻa e uepisaiti jw.org. ʻOku ʻikai fiemaʻu ke lēsisita ke hoko ko ha mēmipa, pea ʻoku ʻikai fiemaʻu ki ai ha fakamatala fakafoʻituituí.
