Ko e Hā Kuo Hoko ki he Fakaʻapaʻapa ki he Moʻuí?
ʻUHINGA ʻOKU MAHUʻINGA AI ʻA E FAKAʻAPAʻAPA KI HE MOʻUÍ
ʻI hoʻo fai ha meʻa ʻoku kaunga kovi ki hoʻo moʻui leleí pe fakatuʻutāmaki ki he niʻihi kehé, ʻoku hā mei ai ʻoku ʻikai ke ke fakamahuʻingaʻi hoʻo moʻuí pea pehē ki he moʻui ʻa e niʻihi kehé.
-
Ko e ifi tapaká ʻokú ne fakatupunga ʻa e kanisaá pea toe faingataʻa ki he sinó ke fakafepakiʻi ia. Ko e pēseti ʻe 90 nai ʻo e mate ʻi he kanisā ʻo e maʻamaʻá ko e faʻahinga naʻe ifi tapaka pe ko e niʻihi naʻa nau mānavaʻaki ʻa e ʻahu ʻo e tapaká.
-
Ko e fana fakatokolahí ʻokú ne uesia fakaeongo ʻa e tokolahi ʻi he taʻu kotoa. ʻOku pehē ʻe ha līpooti mei he ʻUnivēsiti Stanford: “Naʻe fakahaaʻi ʻe ha fekumi naʻa mo e faʻahinga naʻa nau hao mei he fana ʻi he ʻapiakó ʻoku nau kei tofanga pē mo e ngaahi uesia fakaeongo mo fakaeʻatamai hili ha ngaahi taʻu mei ai.”
-
Ko e faʻahinga ʻoku nau fakaʻuli konaá pe ngāueʻaki ʻa e faitoʻo kona tapú ʻoku nau ʻai ke ʻi ha tuʻunga fakatuʻutāmaki ʻa e moʻui ʻa e kau fakaʻuli kehé mo e kau lue laló. ʻI he fakahaaʻi ʻe he kakaí ʻa e taʻetokaʻi ki he moʻuí, ʻoku uesia ai mo e moʻui ʻa e niʻihi kehé.
MEʻA ʻE LAVA KE KE FAÍ
Maluʻi hoʻo moʻuí. ʻOku ʻikai ʻaupito fuʻu tōmui ke tuku ange ʻa e ngaahi tōʻonga fakatupu maumau ʻo hangē ko e ifi tapaká, ifi sikaleti ʻuhilá, inu tōtuʻá pe ngāueʻaki ʻa e faitoʻo kona tapú. Ko e ngaahi tōʻonga ko iá ʻe fakatuʻutāmaki ia ki hoʻo moʻuí pea mo e moʻui ʻa e niʻihi kehé ʻo kau ai ho fāmilí.
Tokanga ki he tuʻunga malú. Ke fakaʻehiʻehi mei he fakatuʻutāmakí, tauhi ho ʻapí ke ʻi ha tuʻunga lelei. Fakaʻuli tokanga pea tokangaʻi ho meʻalelé ke ʻi ha tuʻunga malu. ʻOua ʻe fakaʻatā ʻa e niʻihi kehé ke nau tenge koe ke fai ha meʻa te ne fakatupunga ai ha lavea lahi pe hoko ai ha mate.
Anga-lelei ki he niʻihi kehé. Ko e fakaʻapaʻapa ki he moʻuí ʻoku kau ki ai ʻetau vakai ki he kakai mei he matakali, fonua mo e puipuituʻa fakasōsiale kotoa. Ko e tomuʻa fehiʻá mo e tāufehiʻá ko e tupuʻanga tefito ia ʻa e fakamālohí mo e tau ʻi he māmaní.
MEʻA ʻOKU MAU FAÍ
ʻOku pouaki ʻe he Kau Fakamoʻoni ʻa Sihová ʻa e founga moʻui lelei mo mafamafatatau. Ko ʻemau polokalama ako Tohi Tapú kuó ne tokoniʻi ʻa e kakaí ke taʻofi ʻa e ngaahi tōʻonga fakatupu maumau naʻá ne maʻunimā kinautolú.
ʻOku mau muimui ki he ngaahi fakahinohino pau ki he tuʻunga malú ʻi heʻemau ngāue langá. Ko e kau ngāue pole ʻoku nau langa ʻemau fale fakatahaʻangá pe ngaahi fale kehe ke tokoni ki heʻemau ngāue fakaeako Tohi Tapú, ʻoku akoʻi ke nau tokanga ki he tuʻunga malú. Ko ʻemau ngaahi fale ko ení ʻoku siviʻi maʻu pē koeʻuhí ke muimui ki he lao fakalotofonua ki he tuʻunga malú.
ʻOku mau tokoniʻi ʻa e kakai ʻoku nau hokosia ʻa e fakatamakí. Lolotonga ʻa e māhina ʻe 12 ki muí ni maí, naʻa mau tokoni ai ki he ngaahi fakatamaki fakatupu maumau ʻe 200 ʻi māmani lahi pea fakamoleki ʻa e tola nai ʻe 12 miliona mei he ngaahi paʻanga tokoní ki he faʻahinga naʻe maʻukoviá.
ʻI he tō ʻa e Ebola pea kamata ke ne fakaʻauha ʻa e kakai ʻo ʻAfilika Hihifó (2014) pea mo e Lepupilika Temokalati ʻo Kongó (2018), naʻa mau akoʻi ʻa e kakaí ke nau fakaʻehiʻehi mei he mafola ʻa e mahaki fakatupu mate ko ení. Naʻa mau fekauʻi atu ha kau fakafofonga ke nau fai ha malanga ʻi he kaveinga “Talangofuá ʻOkú Ne Fakahaofi ʻa e Moʻuí.” Naʻa mau fokotuʻu ha ngaahi tuʻuʻanga fanofano ʻi he hūʻanga ki heʻemau feituʻu faiʻanga lotú pea fakamatalaʻi ʻa e mahuʻinga ʻo e fanofanó mo e ngaahi founga kehe fakaemaluʻí.
ʻI Siela Leone, naʻe fanongonongo ʻi he letioó ʻo fakaongoongoleleiʻi ʻa e Kau Fakamoʻoni ʻa Sihová ʻi heʻenau tokoniʻi ʻa e kau Fakamoʻoní mo e kakai kehé ke fakaʻehiʻehi mei he vailasi Ebola.
Ko e tuʻuʻanga fanofano ʻi he Fale Fakatahaʻangá lolotonga ʻa e tō ʻa e Ebola ʻi he 2014 ʻi Laipīliá
a ʻI he Hahake Lotolotó ʻi he kuonga muʻá, ko e fiemaʻu fakapotopoto ko iá ʻoku hā ai ʻa e tokanga moʻoni ki he malu ʻa e ngaahi mēmipa ʻo e fāmilí mo e niʻihi kehé.
