Ko e ako ʻoku makatuʻunga ʻi he Tohi Tapú ʻoku ʻi ai ʻene mālohi fakaofo ke ne liliu ʻa e moʻuí. Fakakaukau ki ha faʻifaʻitakiʻanga ʻe ua ʻo e meʻá ni: Ko Ricardo mo Andres.

RICARDO: ʻI heʻeku taʻu 15, naʻá ku kau ai ʻi ha kengi. Ko hoku ngaahi kaungāmeʻa foʻoú naʻa nau tākiekina lahi ʻeku moʻuí. Ko ia ai, naʻe hoko ia ko ʻeku taumuʻá ke u ngāue pōpula ʻi he taʻu ʻe 10! ʻE ongo fakavalevale nai ia. Ka ʻi hoku feituʻú, ko e faʻahinga naʻa nau ngāue pōpulá naʻe manakoaʻi mo fakaʻapaʻapaʻi. Pea naʻá ku loto ke u hangē ko kinautolú.

Naʻá ku ʻahiʻahiʻi ʻa e meʻa kotoa ʻoku kaunga ki he moʻui fakakengí, kau ai ʻa e faitoʻo kona tapú, fehokotaki fakasinó mo e fakamālohí. ʻI he pō ʻe taha naʻá ku kau ai ʻi ha tau fana. Naʻá ku fakakaukau ʻe tāmateʻi ai au, ka naʻá ku hola ʻo hao moʻui. ʻI he hili iá, naʻe kamata ke u fakakaukau fakamātoato ange fekauʻaki mo ʻeku moʻuí mo ʻeku ngaahi taumuʻá, pea naʻá ku fakapapauʻi ke u fai ha liliu. Ka ʻe anga-fēfē? Te u maʻu mei fē ha tokoni?

Ko e tokolahi taha hoku ngaahi kāingá naʻe ʻikai ke nau fiefia. Naʻe fonu palopalema ʻenau moʻuí. Ka naʻe ʻikai ke pehē ʻa e fāmili ia ʻo ʻeku faʻētangata siʻisiʻí. Naʻá ku ʻiloʻi ko e kakai lelei kinautolu, pea naʻá ku ʻiloʻi naʻa nau moʻuiʻaki ʻa e ngaahi tefitoʻi moʻoni Fakatohitapú. Ko hono moʻoní, naʻá ku ako meiate kinautolu ko e huafa ʻo e ʻOtuá ko Sihova. Ko ia, ʻikai fuoloa mei he tau faná, naʻá ku lotu kia Sihova, ʻo ngāueʻaki hono huafá pea kole kiate ia ke ne tokoniʻi au. Naʻá ku ʻohovale ʻi he ʻaho hokó, naʻe tukituki mai ha taha ʻo e Kau Fakamoʻoni ʻa Sihová! Naʻá ne hoko ko ʻeku faiako ako Tohi Tapú.

Naʻe vave ʻeku fehangahangai mo ha pole lahi. Naʻe faʻa tā mai hoku ngaahi kaungāmeʻa ki muʻá ʻo kole mai ke mau kiʻi feohi. Neongo naʻe ʻikai ke faingofua, naʻá ku tala ange ʻikai. Naʻá ku fakapapauʻi ke hokohoko atu ʻeku ako Tohi Tapú, pea ʻoku ou fiefia naʻá ku fai ia! Naʻe fakaofo ʻa e liliu ʻeku moʻuí, pea naʻá ku maʻu ʻa e fiefia moʻoní.

ʻOku ou manatuʻi ʻeku tala ange ki he ʻOtuá ʻi he lotu naʻe ʻi ai e taimi naʻá ku loto-lelei ai ke ngāue pōpula ʻi he taʻu ʻe 10 koeʻuhí ke u maʻu ʻa e fakaʻapaʻapa ko e mēmipa ʻo ha kengi. Ko ia naʻá ku kole kiate ia ke tuku muʻa ke u ngāue kiate ia ʻi he taʻu ʻe 10 ko ha faifekau taimi-kakato koeʻuhí ke u tokoniʻi ʻa e niʻihi kehé ʻo hangē pē ko hono tokoniʻi aú. Naʻe tali ʻe he ʻOtuá ʻeku lotú, he kuó u ngāue ko ha faifekau taimi-kakato ʻi he taʻu ʻe 17! Pea te u tānaki atu, naʻe ʻikai ʻaupito ke tuku pilīsone au.

Kae kehe, ko e tokolahi hoku ngaahi kaungāmeʻa ki muʻá ʻoku nau lolotonga ngāue pōpula ʻi he ngaahi taʻu lahi. Ko e niʻihi kuo nau mate. ʻI he fakakaukau atu ki aí, ʻoku ou houngaʻia lahi ʻi hoku ngaahi kāinga Fakamoʻoní. Naʻa nau loto-lelei ke hoko ʻo kehe, ke moʻuiʻaki ʻa e Tohi Tapú. Naʻá ku hoko ʻo fakaʻapaʻapaʻi lahi ange kinautolu ʻi ha toe taha pē ʻi he kengí. Mahulu hake ʻi ha toe meʻa, ʻoku ou fakamālō ki he ʻOtuá ʻi hono akoʻi au ki he founga moʻui lelei tahá.

 ANDRES: Naʻe fanauʻi pea ʻohake au ʻi ha feituʻu masivesiva ʻa ia naʻe anga-maheni ai ʻa e faitoʻo kona tapú, kaihaʻa fakamālohí, tāmaté mo e feʻauakí. Ko ʻeku tamaí naʻe maʻunimā ia ʻe he ʻolokaholó mo e kōkeiní. Ko ia mo ʻeku faʻeé naʻá na faʻa kē, ʻo felāuaki mo fetāʻaki.

ʻI heʻeku kei siʻí, naʻe kamata ke u inu ʻolokaholo pea ngāueʻaki ʻa e faitoʻo kona tapú. Naʻá ku fakamoleki ʻa e lahi taha hoku taimí ʻi he veʻe halá, ʻo kaihaʻa pea fakatau atu ʻa e meʻa naʻá ku kaihaʻasí. ʻI heʻeku fuʻu lahi angé, ko ʻeku tamaí naʻá ne feinga ke vāofi mo au ʻi ha founga hala, ʻi heʻene akoʻi mai ʻa e founga ke hū fakafufū mai ai ʻa e faitoʻo kona tapú mo e ngaahi meʻa taʻefakalao kehe ki he fonuá pea fakatau atu ia. Naʻá ku maʻu ʻa e paʻanga lahi​—ʻi ha founga vave. ʻI he ʻaho ʻe taha, naʻe haʻu ʻa e kau polisí ki hoku ʻapí. Naʻa nau puke au, pea naʻe tautea au ke tuku pilīsone ʻi he taʻu ʻe nima ko e teuaki fakapō.

ʻI he pongipongi ʻe taha, naʻe ongona ha fanongonongo ʻi he sipika ʻi he pilīsoné ʻo fakaafeʻi ʻa e kau pōpulá ki ha fetalanoaʻaki Fakatohitapu naʻe fai ʻe he Kau Fakamoʻoni ʻa Sihová. Naʻá ku fili ke kau ki ai. Naʻe ʻuhinga lelei ʻa e meʻa naʻá ku fanongo ki aí, ko ia naʻá ku kamata ako ʻa e Tohi Tapú mo e Kau Fakamoʻoni ʻa Sihová. Naʻe ʻikai ke nau fakasiʻia ʻa e pōpoaki ʻo e Tohi Tapú ke ongo lelei ki he fanongó ka naʻa nau fakahaaʻi mai kiate au ʻa e ngaahi tuʻunga fakaeʻulungaanga māʻolunga ʻa e ʻOtuá.

Naʻe vave ʻeku ʻiloʻi heʻikai lava ke u fai ʻa e ngaahi liliu ʻoku fiemaʻú ʻo taʻeʻiai ha tokoni, tautefito ʻi hono fakamanamanaʻi au ʻe he kau pōpula naʻe ʻikai ke nau saiʻia ʻi he meʻa naʻá ku faí. Ko ia naʻá ku lotu ki ha mālohi mo ha poto, pea naʻe tokoniʻi au ʻe Sihova. Ko hono moʻoní, ʻi he ʻikai foʻi ʻi heʻenau fakamanamaná, naʻá ku loto-toʻa ʻo talanoa ki he kau pōpula kehé ʻo fekauʻaki mo e Tohi Tapú.

ʻI he aʻu ki he ʻaho naʻe tuku ange ai aú, naʻá ku manavasiʻi ʻaupito ʻou loto moʻoni ke u toe nofo fuoloa atu ʻi he pilīsoné! ʻI heʻeku mavahé, naʻe tokolahi ʻa e kau pōpula naʻa nau taʻataʻalo mai. Naʻe aʻu ʻo lea anga-ʻofa mai ʻa e niʻihi, “ʻAlu ā ki ʻapi, kiʻi tauhi-sipi.”

ʻOku faingataʻa ke u fakakaukau atu pe naʻe mei iku fēfē ʻeku moʻuí kapau naʻe ʻikai ke u fakaʻatā ʻa e ʻOtuá ke ne akoʻi au. ʻOku ou fakamālō lahi ʻaupito ki he ʻofa ʻa e ʻOtuá ʻiate aú pea naʻe ʻikai ke ne vakai mai kiate au naʻe ʻikai ha toe ʻamanaki. a