Ko e kakai faʻa ngāué ʻoku ʻikai ke nau fakaʻehiʻehi mei he ngāué. ʻI hono kehé, ʻoku nau fiefia ʻi he ngāue mālohi ke tokonaki ʻenau ngaahi fiemaʻu fakafoʻituituí pea tokoniʻi ʻa e niʻihi kehé​—neongo kapau ko ʻenau ngāué ʻoku ʻikai ke fuʻu fakamānako.

Pe te ke saiʻia ai pe ʻikai, ko e moʻuí ʻoku fonu ʻi he ngaahi fatongia. ʻI ha māmani ʻoku tokolahi ai ʻa e kakai ʻoku ʻikai ke nau saiʻia ʻi he foʻi fakakaukau ko e ngāue mālohí, ko e faʻa ngāué ʻokú ne ʻai koe ke ke ʻi ha tuʻunga lelei.​—Tangata Malanga 3:13.

“Kuó u ʻiloʻi ko e taimi ʻokú ke ngāue mālohi aí ʻokú ke laukauʻaki ia pea ongoʻi fiemālie ʻi loto. Ko e ongoʻi fiemālie ʻi loto ko iá kuó ne ʻai moʻoni au ke u saiʻia ʻi he ngāué. Ko e ngāue mālohi maʻu peé te ne tokoniʻi koe ke ke fakatupulekina foki ha ongoongo ʻoku lelei.”​—Reyon.

TEFITOʻI MOʻONI FAKATOHITAPU: “ʻOku ʻaonga ʻa e faʻahinga kotoa pē ʻo e ngāue mālohí.”​—Palōveepi 14:23.

Fakatupulekina ha vakai lelei ki he ngāué ʻaki ʻa e muimui ʻi he ngaahi sitepu ko ení.

Laukauʻaki hono fakahoko lelei ʻa e ngaahi meʻá. Tatau ai pē pe ʻokú ke fai ha puʻi, fakaʻosiʻosi hoʻo homueká pe fai ha ngāue fakamāmani, fai ho lelei tahá. ʻI hoʻo fakahoko lelei ha ngāue, kumi ki ha ngaahi founga ke fakalakalaka ai​—fai ia ke toe vave ange pe lelei ange. Ko e lahi ange hoʻo pōtoʻí, ko e lahi ange ia hoʻo fiefia ʻi hoʻo ngāué.

TEFITOʻI MOʻONI FAKATOHITAPU: “Kuó ke mamata ki ha tangata ʻoku pōtoʻi ʻi heʻene ngāué? Te ne tuʻu ʻi he ʻao ʻo e ngaahi tuʻí; ʻe ʻikai te ne tuʻu ʻi he ʻao ʻo e kakai lāuvalé.”​—Palōveepi 22:29.

Sio ki he ʻata lahi angé. ʻI he meimei taimi kotoa ʻokú ke fakahoko lelei ai ho ngaahi fatongiá ʻoku toe maʻu ʻaonga foki mei ai ʻa e niʻihi kehé. Ko e fakatātaá, ʻi he taimi ʻokú ke faʻa ngāue ai ʻi ʻapí, ʻokú ke fakamaʻamaʻa ai ʻa e kavenga ʻa e niʻihi kehe ʻi ho fāmilí.

TEFITOʻI MOʻONI FAKATOHITAPU: “ʻOku ʻi ai ʻa e fiefia lahi ange ʻi he foaki atú ʻi he maʻu maí.”​—Ngāue 20:35.

Fai ʻa e meʻa lahi ange. ʻI he ʻikai ke fai pē ha meʻa feʻunga, feinga ke fai ʻa e meʻa lahi ange ʻi he meʻa ʻoku fiemaʻu ke ke faí. ʻI he foungá ni, ʻokú ke mapuleʻi ai hoʻo moʻuí​—ʻo fai ʻa e meʻa lahi ange ʻo ʻikai koeʻuhí pē ʻoku kounaʻi koe, ka koeʻuhí ʻokú ke fili ke fai ia.​—Mātiu 5:41.

TEFITOʻI MOʻONI FAKATOHITAPU: “ʻOua naʻa hoko hoʻo ngāue leleí ʻo fai ʻi he kounaʻi, ka ʻi hoʻo loto tauʻatāina pē ki ai.”​—Filimone 14.

Hoko ʻo mafamafatatau. Ko e kakai faʻa ngāué ʻoku ʻikai ke nau fakapikopiko pe fuʻu ngāue tōtuʻa. Ko ʻenau taumuʻá ke mafamafatatau, ʻo fiefia fakatouʻosi ʻi he ngāue mālohí mo e taimi mālōloó.

TEFITOʻI MOʻONI FAKATOHITAPU: “ʻOku lelei ange ke fonu ʻa e nima ʻe taha ʻi he mālōloó ʻi he fonu ʻa e nima ʻe ua ʻi he ngāue mālohi mo tuli pē ki he matangí.”​—Tangata Malanga 4:6.